Siglir tar il cuntegn

Purtrets da professiun TecnicistA dal tun

Tecnicistas e tecnicists dal tun lavuran tar registraziuns, sonorisaziuns e producziuns da radio e televisiun cun las apparaturas audiotecnicas. En lur professiun collian els/ellas enconuschientschas tecnicas e musicalas.

Legende: Video tecnicist tun abspielen. Laufzeit 2:11 Minuten.
Dals 30.01.2015.

Tecnicistas e tecnicists dal tun lavuran tar radio e televisiun, en studios dal tun, teaters, salas da concert, firmas da sonorisaziun ed en l’industria da film e da musica. Els/ellas èn ils experts e las expertas per la sonorisaziun, la registraziun e la transmissiun da tuns. Lur incumbensa principala consista en concepir ils maletgs sonors che duain vegnir emess sur autpledader u ureglier tenor aspects tecnics ed artistics.

En lur activitad cumbineschan tecnicistas e tecnicists dal tun know-how cun furmaziun musicala. Els/ellas intermedieschan tranter las pretaisas artisticas e las pussaivladads tecnicas.

Tecnicist da Tun al pult da maschadar.
Legenda: Sco tecnicist dal tun stons avair in flair per tecnica e musica. RTR

Visavi artistas, dirigents, cumponistas u reschissurs surpiglian las tecnicistas ed ils tecnicists la funcziun da partenaris cumpetents che gidan a realisar il meglier pussaivel lur intenziuns ed a sviluppar cumplainamain lur savair. Cun utilisar ils meds tecnics adequats, regular ils singuls chanals, eleger e plazzar ils microfons po il tecnicist u la tecnicista dal tun influenzar la tonalitad.

Uffants e lur scolast en il studio dal Radio Rumantsch.
Legenda: Registraziuns cun ina classa da la Val Müstair. RTR, D. HARDEGGER

Tar sonorisaziuns ed emissiuns live surveglian las tecnicistas ed ils tecnicists dal tun permanentamain la qualitad dal tun. Sin defurmaziuns e disturbis dal tun ston els/ellas pudair reagir immediat cun manipular il dretg buttun u reglader. Era en cas da disturbis tecnics dovri ina sperta survista e reacziun. Ulteriuras incumbensas èn la preparaziun ed il mantegniment da l’infrastructura tecnica (pults da maschadar, microfons, sistems da registraziun da pliras lingias, maschinas master, apparats da mesirar, autpledaders, amplifitgaders etc.) e la participaziun tar la planisaziun d’indrizs tecnics dal tun.