Um/dunna da camera

Umens e dunnas da camera èn responsabels per la cumposiziun fotografica artistica da producziuns da film, televisiun e video u per la cumposiziun fotografica da contribuziuns schurnalisticas. Els/ellas lavuran en stretg contact cun la reschia, la redacziun e las ulteriuras persunas cumpigliadas.

Filmar en la natira. Avrir maletg en lightbox.

Legenda da maletgs: Dunna da camera en acziun. RTR

Tar producziuns inscenadas da film, televisiun e da video (films da kino e televisiun, serias, emissiuns da divertiment, films da reclama, d’industria etc.) è la persuna davos la camera responsabla per la cumposiziun visuala. Ils cunfins tranter cumposiziun ed inscenaziun n’èn betg adina clers e perquai dovri ina stretga collavuraziun cun la reschia. Grondas producziuns han mo success, sche la collavuraziun cun tut las persunas responsablas (producziun, illuminaziun, tun, mascra, equipament etc.) funcziunescha senza difficultads.

Avant ina producziun sa famigliarisescha l’um/dunna da camera cun il scenari, elavura ensemen cun la reschia in concept dramaturgic e discutescha dumondas tecnicas. Els/ellas consulteschan medemamain la direcziun da producziun, l’equipament, la mascra ed autras spartas cumpigliadas. Cura ch’ils plazs da filmar èn definids mettan els/ellas ensemen – en stretga collavuraziun cun la glieud da l’illuminaziun – lur equipament: cameras, material da film, stativs, cranas, illuminaziun etc.

Durant il filmar sa fatschenta l’um/dunna da camera cun la cumposiziun fotografica adattada a l’istorgia che cumpiglia t.a. la quadrascha (retagl da maletg), la perspectiva e la glisch. El/ella definescha per mintga quadrascha la posiziun ed ils moviments da la camera, elegia ils objectivs e definescha la realisaziun visuala da las singulas scenas. Entras la cumposiziun da glisch e colurs vegn creà atmosferas, caracterisà localitads e mess las acturas ed ils acturs en la dretga glisch.

Finida la producziun, fan ils umens e las dunnas da camera pront ils singuls instruments da lavur per il proxim diever e laschan reparar eventuals defects. Durant la producziun giuditgeschan els/ellas las scenas filmadas, defineschan la glisch e la colur e decidan davart l’applicaziun d’effects spezials.

Um/dunna da camera Avrir maletg en lightbox.

Legenda da maletgs: Um/dunna da camera rtr

Per il schurnalissem da televisiun (emissiuns da novitads, reportaschas da sport etc.) predominescha, sper la cumposiziun visuala, la communicaziun d’infurmaziuns. Auter che tar grondas producziuns èn las squadras bler pli pitschnas e cumpiglian savens mo in/a schurnalist/a ed ina persuna a la camera. Glieud da la camera che lavura en quest sectur stat sut grond squitsch da temp. Ella sto pudair improvisar, esser flexibla e corporalmain fitta, perquai ch’i vegn savens duvrà cameras da spatla. La communicaziun entaifer la squadra è fitg impurtanta.