RTR è la suletta chasa da medias audiovisuala da la Svizra Rumantscha per la Svizra Rumantscha ed è in'unitad regiunala da la SRG SSR. Cun ina purschida da radio da 24 uras, cun emissiuns da televisiun regularas ed in’offerta digitala attractiva porscha RTR in program cumplessiv che accumpogna Rumantschas e Rumantschs da tut las vegliadetgnas, dalunsch e damanaivel tras il mintgadi, tras il mund, tras la vita. RTR è la patria rumantscha en tun, text e maletg. RTR è e dat identitad rumantscha.
RTR al puls dal Grischun
Dapi sia entschatta ha RTR suandà in princip impurtant: RTR metta las regiuns en il center. Confurm a quella intenziun ha RTR rinforzà successivamain sia preschientscha en las regiuns. Cun ina rait da correspundentas e correspundents en las redacziuns a Glion, Mustér, Savognin, Samedan, Scuol e Berna franchescha RTR oz il liom ed il barat cun e tranter las regiuns ed è uschia là, nua che insatge capita.
Il regiunal en il center
Tge muventa la populaziun da nossas regiuns? Tge dumondas en connex cun la politica, l’economia, la convivenza, la cultura ed il sport occupan ella? RTR drizza il focus sin las regiuns e metta ellas en il center da ses programs:
- RTR tematisescha las sfidas ed ils success da noss commerzi indigen – en il sectur da las interpresas pitschnas e mesaunas, dal turissem, da l’agricultura, da l’industria pitschna – ma era da la furmaziun e da la sanadad.
- RTR maina ed intermediescha la debatta davart dumondas politicas e davart la convivenza en noss chantun.
- RTR explitgescha ed accumpogna la tgira ed il svilup da nossas tradiziuns, da nossa cultura e da noss sport.RTR metta las regiuns e la lingua en il center e rapporta directamain da la vita en il chantun Grischun.
- RTR collia las regiuns e promova il barat. Grazia ad ina rait da correspundentas e da correspundents che vivan e lavuran en las regiuns garantescha RTR infurmaziuns e rapports d’emprim maun. Saja quai da radunanzas communalas, d’occurrenzas culturalas u a chaschun d’inscunters e da visitas spezialas. Qua tras stgaffescha e rinforza RTR l’identitad rumantscha e promova la debatta ed il discurs democratic er en las regiuns.
Pertge stain nus?
- Per in schurnalissem da qualitad: nossas valurs centralas (objectiv – sachgerecht; multifar – vielfältig; independent – unabhängig) èn dapertut las medemas.
- Per in service public che dat orientaziun e pussibilitescha respostas a dumondas da la societad.
- Per in schurnalissem che pussibilitescha a noss public d’as far sez in maletg ed in’opiniun.
- Per in princip cumplessiv (ganzheitlicher Ansatz), raziunal e reflectà – curt: per il cor, per il chau e per il venter, e quai sur tut las generaziuns ora.
- Fidanza è noss fundament. Nus essan independents e sincers.
Audio RTR
Nossa purschida audiovisuala è multifara e da chattar sin rtr.ch/audio.
Podcasts
RTR producescha ina purschida multifara da formats auditivs. Latiers tutgan formats discursivs, gieus auditivs e formats da true crime sco era formats da cultura, religiun e musica. Cumplettada vegn la purschida cun cuntegns politics, formats da discussiun sco era cun contribuziuns pli approfundadas. Ils cuntegns èn da tut temp da chattar en l'audioteca.
Radio RTR
Il radio accumpogna ses public tras il di ed al tegna sin il current. Nus plazzain ils cuntegns tenor il decurs dal di da noss public. Noss focus è sin la rapportaziun regiunala. Nus producin cuntegn specific per gruppas en miras entaifer l’intschess rumantsch (p.ex. chors, chatscha). Nus reagin spontan e svelt sin situaziuns actualas e pudain adattar il program. Radio RTR è ina vusch indispensabla, innovativa e relevanta per la cuminanza rumantscha. RTR sa distingua tras ina purschida equilibrada d'infurmaziun, cultura, accumpagnament ed identitad regiunala per rinforzar la coesiun sociala.
La structura da noss Radio RTR prevesa:
- Novitads/ service (novitads, aura, traffic, …)
- Rapportaziun regiunala
- Emissiuns da profundaziun
- Uras da musica: specials
Video RTR
Play RTR
La gronda part da la purschida da video da RTR vegn producida consequentamain digital first. En il center stat la plattafurma da streaming Play RTR, nua che tut ils formats da video èn disponibels da tut temp. La purschida cumpiglia videos dals secturs infurmaziun, cultura, savida, divertiment e sport ed è orientada a l'utilisaziun flexibla independentamain da temp e lieu.
Televisiun Rumantscha
La purschida da televisiun lineara da RTR sa restrenscha sin las spartas infurmaziun, furmaziun e documentaziun. Il focus da las emissiuns dad info è sin la rapportaziun regiunala (politica, economia, cultura, divertiment e sport). Tar ils films documentars stattan cunzunt temas en connex ed en interacziun cun il spazi vital alpin en il focus (biografias, purtrets, migraziun, uman e ambient ed auters).
Las emissiuns da la Televisiun Rumantscha vegnan emessas sin il chanal da televisiun SRF1 e sin nossa plattafurma da streaming Play RTR. Activond la pagina TXT 777, pon ins guardar tuttas emissiuns era cun suttitels tudestgs.
Emissiuns impurtantas:
- Telesguard, glindesdi fin venderdi a las 17.40 sin SRF1: Il Telesguard è l’emissiun d’infurmaziun da la Televisiun Rumantscha cun istorgias dal Grischun. L’emissiun rapporta da schabetgs da la Svizra Rumantscha e dal chantun Grischun e da temas ch’èn impurtants per quels che discurran rumantsch.
- Minisguard, sonda a las 17.40 sin SRF1: Il Minisguard è l’emissiun emnila d’infurmaziun da la Televisiun Rumantscha per ils uffants. L’emissiun declera als uffants temas politics, economics, culturals, ord il mund dal sport e da la societad en furma chapaivla e divertenta.
- Cuntrasts, dumengia a las 17.25 sin SRF1: Il num Cuntrasts è program. L’emissiun viva da cuntrasts da stil, da differentas avischinaziuns a temas variads. Ils Cuntrasts preschenta e reflectescha temas, midadas, svilups e moviments dal mund rumantsch, relevants per la Rumantschia e per il Grischun.
- 50:50: Il videocast vul promover mintga mais discurs approfundads cun exponentas ed exponents da l'economia, da la politica e da la societad.
- Clic: Clic – la camera va. Clic – en il program da tagl. Clic – il video cumenza. E clic fai era tranter noss reporters e nossas protagonistas. En las reportaschas da Clic retschertgan las reportras ed ils reporters quels temas che fatschentan els e lur conturn. Els raquintan cun in egl persunal. Fin ch’i fa clic, era tar tai!
Digital e multimedial
La purschida online da RTR è fitg multimediala ed orientada a l’utilisaziun flexibla. Sin la pagina rtr.ch porscha RTR novitads, audios, videos, podcasts ed istorgias multimedialas sco era contribuziuns dal passà davart il Grischun e la Svizra Rumantscha.
Central è era la plattafurma «Play+», nua che novitads, serias e documentaziuns èn disponiblas da tut temp sin dumonda. Ils cuntegns pon vegnir utilisads sin differents apparats sco smartphone, tablet u desktop e per part er offline.
La purschida vegn cumplettada cun livestreams (radio e televisiun), podcasts sco er chanals da social media. RTR è actualmain preschenta sin quests chanals:
Amaturas ed amaturs da musica chattan ina purschida vasta sin la plattafurma musicala «Play Festas». Uschia pussibilitescha RTR in access independent dal lieu e dal temp a cuntegns rumantschs e cuntanscha er digitalmain ses public.
RTR sco patruna da lavur fidaivla
RTR è ina garanta per ina ferma plazza da medias grischuna ed è ina impurtanta patruna da lavur e partenaria per il commerzi indigen. RTR è ina impurtanta patruna da lavur en il Grischun cun radund 160 collavuraturas e collavuraturs.
RTR porscha:
- emprendissadis e stages
- plazzas en numerusas professiuns
- bunas perspectivas per giuvenils
Dapli infurmaziuns davart RTR sco patruna da lavur datti sin: rtr.ch/jobs
...e sche Vus essas interessadas ed interessads a RTR sco patruna da lavur, dai era in cuc sin nossas plazzas libras.
Lingua ed incumbensa
RTR rapporta dal mund en l’atgna lingua. Per RTR èsi evident da duvrar il rumantsch per scriver e discurrer da tut ils secturs da la vita, e quai a moda clera e differenziada. RTR stima la lingua e dat paisa da la duvrar correctamain. RTR è in motor per il diever ed il svilup dal rumantsch. Nus discurrin da temas actuals. En consequenza vegn la lingua actualisada d’in cuntin. Las novas noziuns e formulaziuns cumpletteschan il Pledari Grond e stattan lura immediat a disposiziun a tut las Rumantschas ed a tut ils Rumantschs. RTR contribuescha er al svilup da differents linguatgs spezials sco il linguatg dal sport u il linguatg da giuvenils.
RTR discurra la lingua da ses public, damai tut ils tschintg idioms rumantschs, savens era cun colorit local. En rumantsch grischun vegnan prelegidas las novitads che cumpiglian circa 15% dal program e scrittas las contribuziuns online.
RTR è era ina fanestra vers las autras regiuns da la Svizra. Cun derasar ses programs sin plaun naziunal ed a moda digitala e cun suttitular sias emissiuns (teletext 777 u suttitels averts) renda RTR visibla la cultura indigena e fa attent ad ella, e quai sur ils cunfins linguistics e geografics. RTR mussa en las autras regiuns linguisticas che la Svizra rumantscha exista e ch’ella contribuescha a la diversitad e singularitad da noss pajais. Il respect e la chapientscha vicendaivla rinforza RTR dentant era cun dar in sguard en las autras regiuns linguisticas, per exempel cun numerusas collavuraziuns interregiunalas e projects naziunals entaifer la SRG SSR, sco per exempel l’emissiun «Die Anderen – Les autres – Gli altri – Ils auters». RTR tgira en pli er ils contacts cun las Rumantschas ed ils Rumantschs en auters pajais
Qualitad
Qualitad è in process cuntinuant. RTR sviluppa sia purschida permanentamain vinavant.