Purtret / RTR über uns - Tgi essan nus - in purtret da RTR

RTR è la suletta chasa da medias audiovisuala da la Svizra Rumantscha per la Svizra Rumantscha ed è in'unitad d'interpresa da la SRG SSR. RTR è la patria rumantscha en tun e maletg ed è uschia identitad rumantscha.

Tura virtuala tras la chasa da medias RTR

Vulais Vus dar in sguard davos nossas culissas? Nus avain realisà per Vus ina tura virtuala e prendain cun Vus sin in gir tras la chasa da medias a Cuira. Visitai noss studios e nossas redacziuns e guardai co che Voss program da radio, televisiun ed online vegn fatg.

RTR al puls dal Grischun

Legenda: RTR

Dapi sia entschatta ha RTR suandà in princip impurtant: RTR metta las regiuns en il center. Confurm a quella intenziun ha RTR rinforzà successivamain sia preschientscha en las regiuns. Cun ina rait da correspundentas e correspundents en las redacziuns a Glion, Mustér, Savognin, Samedan, Scuol e Berna franchescha RTR oz il liom ed il barat cun e tranter las regiuns ed è uschia là, nua che insatge capita.

Legenda: RTR

Tge muventa en la vita da nossas regiuns? Tge dumondas occupan nossa populaziun? RTR drizza il focus sin las regiuns e metta ellas en il center da ses programs:

• RTR mussa las sfidas ed ils success da noss commerzi indigen – en il chantun da KMUs, dal turissem, da l’agricultura, da l’industria internaziunala sco er da l’industria pitschna e sin il sectur da la furmaziun e sanadad.
• RTR mussa ed intermediescha la debatta davart dumondas politicas e da convivenza en noss chantun.
• RTR mussa ed accumpogna la tgira ed il svilup da nossas tradiziuns, da nossa cultura e da noss sport.

Radio RTR

Il Radio RTR emetta durant 24 uras per rumantsch. Singulas emissiuns d’infurmaziuns vegnan surpigliadas dal Radio SRF. Il program dal Radio RTR sa drizza ad in vast public: emissiuns da divertiment, infurmaziuns localas fin internaziunalas, reportaschas da sport ed in program da musica che tanscha dal pop al rock e da la musica populara als semperverds. Il bel londervi: 50% da la musica emessa en ils programs dal Radio RTR è musica svizra e 30% da tut la musica emessa è musica grischuna.

Legenda: RTR

Televisiun Rumantscha

Las emissiuns da la Televisiun Rumantscha vegnan emessas sin il chanal da televisiun SRF1. Activond la pagina TXT 777, pon ins guardar tuttas emissiuns era cun suttitels tudestgs.

• Telesguard, glindesdi fin venderdi a las 17.40 sin SRF1: Il Telesguard è l’emissiun d’infurmaziun da la Televisiun Rumantscha cun istorgias dal Grischun. L’emissiun rapporta da schabetgs da la Svizra Rumantscha e dal chantun Grischun e da temas ch’èn impurtants per quels che discurran rumantsch.
• Minisguard, sonda a las 17.40 sin SRF1: Il Minisguard è l’emissiun emnila d’infurmaziun da la Televisiun Rumantscha per ils uffants. L’emissiun declera als uffants temas politics, economics, culturals, ord il mund dal sport e da la societad en furma chapaivla e divertenta.
• Cuntrasts, dumengia a las 17.25 sin SRF1: Il num Cuntrasts è program. L’emissiun viva da cuntrasts da stil, da differentas avischinaziuns a temas variads. Ils Cuntrasts preschenta e reflectescha temas, midadas, svilups e moviments dal mund rumantsch, relevants per la Rumantschia e per il Grischun.

Multimedia

La purschida da RTR chattais Vus era digital sin rtr.ch. Nus essan per Vus al puls da quai che capita e rapportain regiunal e local era sin noss chanals da social media. La purschida audiovisuala pudais Vus per exempel era telechargiar sco app «Play RTR» e tadlar e guardar las emissiuns da RTR cura e nua che Vus vulais.

RTR sco patruna fidaivla

RTR è ina garanta per ina ferma plazza da medias grischuna ed è ina impurtanta patruna da lavur e partenaria per il commerzi indigen. Oz fatschenta RTR radund 170 persunas, da quellas stattan 95% en il chantun Grischun. Radund 53% stattan a Cuira u conturns, 31% en la Surselva, 8% en Engiadina, 3% en il Surmeir u Sutselva e 5% en la diaspora. Dapli cifras e fatgs interessants chattais Vus en la broschura cifras e fatgs.

Per la giuventetgna rumantscha porscha RTR interessantas ed attractivas perspectivas professiunalas cun la pussaivladad da far fufragnadis, emprendissadis, stages e cun plazzas da lavur en pli che 30 differentas professiuns. Forsa che Vus avais gust da far ina giada in lavuratori FAR MEDIAS tar RTR?

...e sche Vus essas interessadas ed interessads a RTR sco patruna da lavur, dai era in cuc sin nossas plazzas libras.

RTR e la lingua

Dapi 1938 è il rumantsch renconuschì sco lingua naziunala e dapi 1996 sco lingua parzialmain uffiziala. Oz chapeschan en Svizra passa 80’000 persunas rumantsch, 60’000 discurran regularmain rumantsch e per 30’000 persunas è rumantsch il linguatg principal.

RTR è in motor per il diever ed il svilup da la lingua rumantscha. Quai cun duvrar il rumantsch en tut ils idioms e rumantsch grischun. Là, nua che la lingua discurrida vegn a pled, èn tut il tschintg idioms rumantschs d’udir, savens er en ils colorits locals. En rumantsch grischun vegnan las novitads (ca. 15% dal program) prelegidas, e las contribuziuns en scrit per online edidas.

Incumbensa e strategia

Las activitads da RTR sa basan sin la Constituziun federala, la Lescha federala davart radio e televisiun (LRTV), l'Ordinaziun davart radio e televisiun (ORTV), la concessiun da la SSR e sin ils statuts da SRG.R. Las activitads, l'organisaziun e la finanziaziun da RTR vegnan principalmain definidas da la Confederaziun e survegliadas da l'Uffizi federal da communicaziun (Ufcom).

Qualitad

Qualitad n'è nagin stadi, mabain in process. Ella sto adina puspè vegnir elavurada da nov. Nus avain sviluppà instruments per mesirar, diriger e survegliar la qualitad en il program. Impuls e propostas da nossas collavuraturas e noss collavuraturs gidan nus a sviluppar vinavant il management da qualitad a moda orientada a la pratica. Cun questa finamira ans barattain nus plinavant era regularmain cun collegas da la SRG SSR e cun persunas dal fatg externas.