Ils 19 da november 2020 ha la suprastanza da la Lia Rumantscha elegì Diego Deplazes sco nov secretari general. Diego Deplazes, oriund da Sumvitg e sesent a Rabius, è entrà en uffizi il zercladur 2021. Oz è el dapi 100 dis en uffizi. RTR ha vulì savair tge experientschas ch'el ha rimnà en quels 100 dis sco nov secretari general, tge projects ch'el ha gia mess sin via e tge ch'èn las grondas sfidas.
Cumenzà bain
Diego Deplazes s'haja vivì en bain en sia nova incumbensa sco secretari general da la Lia Rumantscha. I saja stà da s'endisar da levar pli baud ch'avant, quai ord la raschun ch'il viadi a la lavur saja er pli lung.
A l'entschatta saja el stà surstà da tuttas differentas incumbensas che vegnan exequidas da la Lia Rumantscha. Betg tuttas sajan sin in'emprima egliada visiblas. Sper lavurs d'introducziun haja el spert stuì sa deditgar a la planisaziun dad activitads, uschia che quai possia ils gremis superiurs.
Bilantscha persunala suenter ils emprims 100 dis
Ch'il rumantsch saja ina chaussa che stat ad el al cor, ha Diego Deplazes detg gia al cumenzament da ses temp tar la Lia Rumantscha. Fin uss haja el gì bler contact cun la glieud, era en las regiuns cun blers barats cun differentas uniuns. Mintga regiun cumbattia cun sias atgnas tematicas ed uss emprovia el d'effectuar insatge, quai cun organisar il program per il 2022.
Il prim effect ed era il pli elementar, nua ch'ins vegn d'effectuar insatge [...], è da duvrar il Rumantsch en il mintga di.
La diaspora e digitalisaziun èn dus impurtants temas
Sustegnair ils Rumantschs ordaifer la regiun rumantscha saja in impurtant tema per il futur, oravant tut vulan ins eruir ils basegns da famiglias cun uffants. Chattar e cuntactar quellas, saja dentant difficil, quai spezialmain en regiuns cun paucs Rumantschs.
Tar la digitalisaziun sajan programs da translatar u da correctura en il focus. Qua duessi dar schliaziuns per in e scadin.
