Il parlament da Cuira sustegna unanimamain l'occurrenza da sport e musica per ils proxims tschintg onns. Perquai han els approvà in credit da 2,4 milliuns francs. Medemamain han els decis da suttametter voluntarmain il credit a la votaziun dal pievel.
La fin d'october ha il «Big Air Festival» gì lieu a Cuira sin l'areal da la Obere Au. L'occurrenza nua che skiunzs e snowboardistas han mussà lur trics sin la schanza da 40 meters autezza, ha carmlà 30'000 visitaders e visitadras en il Grischun. Il «Big Air Festival» duai a lunga vista era trair natiers dapli glieud giuvna che vul alura era abitar u lavurar a Cuira.
Approvà il preventiv 2022
Il parlament da Cuira ha approvà il preventiv per il 2022. La citad quinta da scriver er il proxim onn cifras nairas. Il surpli d'entradas da 900'000 francs è dentant prest 10 milliuns pli pitschen ch'en il preventiv da quest onn. Plinavant ha il parlament decidì da laschar il pe da taglia sin 88% da la taglia chantunala simpla.
Il president da la citad Urs Marti è cuntent che la pandemia n’ha betg gì uschè in grond effect sco spetgà.
