Tgi che dat po er retschaiver

Prominentas e prominents da sport, politica e cultura han lavurà per l'acziun 2xNadal a Berna

Laschar ir video «2 x Nadal: Prominents han sortà e pachetà regals per persunas basignusas»

2 x Nadal: Prominents han sortà e pachetà regals per persunas...

1:44 min, Telesguard dals 6.1.2016

En il center da logistica da la Crusch Cotschna Svizra a Berna han persunas prominentas zavrà e pachetà da nov ils regals che persunas da l'entira Svizra han tramess. Er l'actura Annina Sedlacek e l'actur René Schnoz èn stads da la partida.

En il bajetg a Wabern dasper Berna vegn lavurà mordio. Camiuns portan chars emplenids fin sisum cun pachets da l’acziun 2xNadal. En l’emprima auzada vegnan quels chars lura stgargiads ed ils pachets sa tschentan sin ina tschinta da transport.

In da quels che mira ch’il cul da pachets na chala mai è l’actur René Schnoz. Da gidar autras persunas uschia saja ina super chaussa, di el. « Nus avain uschè blera rauba e na savain savens betg tge far cun tut quai. Lura èsi ina grondiusa chaussa da dar vinavant quai uschia.» E gia piglia el il proxim pachet, avra quel cun ses cuntè e stauscha el en direcziun dad ina gronda maisa. Là reparta l’actura Annina Sedlacek, ensemen cun blers auters, il cuntegn sin differentas plunas. Era per ella è l’acziun 2xNadal in buna chaussa ch’ella sustegni gugent. Sia lavur saja in pau sco pachetar ora regals. Tscherts pachets sajan pachetads magnific. «I è prest donn da stuair pachetar ora tut per zavrar la rauba», di l’actura.

Cuntents cun l’acziun è era Josef Reinhardt, il manader da project da la Crusch Cotschna Svizra. Enfin ier hajan els zavrà da quai da 37’000 pachets. Cuntents saja el era cun la rauba che la glieud trametti ad els. Davent da victualias sco ris, pasta, ieli ni conservas sur products d’igiena e da tualetta enfin tar cudeschs ni carnets e stgatlas da colurs chattian ins tut en quels pachets. Bainvegnids sajan era chalzers per uffants, di Reinhardt. «Oravant tut en ils pajais da l’Europa orientala datti famiglias che na pon betg cumprar a lur uffants buns chalzers. E là èn ils envierns uschè fraids sco tar nus.»

La mesadad da las donaziuns van quest onn en la Moldavia, en la Bielorussia, en l'Armenia ed en la Bosnia-Erzegovina. Tschella mesadad repartan las secziuns chantunalas da la Crusch Cotschna a persunas basegnusas en Svizra.

El center da 2xNadal stettia il patratg dal parter, da pensar da Nadal era a persunas cun las qualas i na giaja betg uschè bain, di Reinhardt.

Dal medem maini è Annina Sedlacek. Parter saja ina da las chaussas las pli impurtantas en la vita. «Ils budists dian gea era che sch’ins dettia hajan ins ils mauns libers per retschaiver. Sch’ins parta cun auters survegn’ins era enavos ina pluna,» di ella e prenda il proxim pachet. Pertge lavur dat i anc detg avunda. Enfin la fin da l’acziun 2xNadal ils 9 da schaner quintan ils responsabels cun 70’000 pachets.