Legenda: MADRegiun Malögia
Cun 77.55 % din votantas e votants da la regiun Malögia GEA a l'iniziativa per in center da sport sin glatsch. L'iniziativa pretenda che la regiun piglia per mauns da construir e gestiunar il center – damai che las singulas vischnancas na pon betg far quai. Las 11 vischnancas da l'Engiadin'Ota han ditg GEA e be la Bregaglia ha refusà l'inziativa. Per realisar il project dovri dentant anc ulteriuras decisiuns: Almain ina votaziun dovri per determinar il lieu ideal per la halla ed in'autra davart la gestiun ed ulteriurs credits necessaris.
Legenda: RTRVaz
Cun 71% ha il suveran da Vaz cleramain ditg NA a la modernisaziun da la plazza da sport en il center da Lai. Il project avess pretendì in credit da 5,9 milliuns francs per realisar in nov bajetg a l’ur da la plazza da sport, ch'avess servì l’enviern sco glatsch e la stad sco plazza da ballape e per currer. La partizipaziun a la votaziun giascha tar 52,5 %. Atgnamain era la votaziun gia planisada il schaner. Damai che betg tut las abitantatas ed ils abitants avevan survegnì la documentaziun necessaria è ella vegnida spustada.
Legenda: RTRClaustra
Ils votants e las votantas da Claustra han ditg GEA ad ina nova chasa da parcar cun circa 430 parcadis. Quai cun 990 cunter 546 vuschs. Var in terz dals parcadis duain esser reservads per il ressort da famiglia «Ober Ganda» – in project ch’ils da Claustra han gia approvà il november passà. Lura ha la vischnanca dentant emblidà da metter en votaziun era la chasa da parcar. Plinavant è la lescha communala davart las segundas abitaziuns vegnida acceptada cleramain cun 63%. Tala sto Claustra anc adattar pervia da l’iniziativa per restrenscher segundas abitaziuns e las leschas federalas latiers.
Legenda: RTRTavau
A Tavau dovri in segund scrutini: Nagin dals dus candidats per il parlament communal è elegì. Ni Claudio Rhyner da la PLD (734 vuschs) ni Hans Vetsch ch'è senza partida (673 vuschs) han cuntanschì l'absolut pli. Tal giascha tar 736 vuschs.
Legenda: RTRVal Müstair
Per il post vacant en la suprastanza communala è Daniel Pitsch da la fracziun da Tschierv elegì. El remplazza Cla Filip Pitsch ch'è sa retratg il november passà. Plinavant han ils Jauers acceptà cun 61% la lescha da turissem. Da nov vegnan las taxas da cura na betg pli incassadas tenor pernottaziuns, mabain tenor capacitads d'alloschi. Cun quai vegn la lescha adattada a las pretensiuns dal dretg chantunal.
Legenda: RTRSan Murezzan
In cler GEA da 79% hai dà dal suveran da San Murezzan per la cunvegna cun la destinaziun Engiadina San Murezzan. Tala reglescha co finanziar eveniments d'impurtanza regiunala – uschenumnads top-events. La cumpart da San Murezzan munta ad in mez milliun francs ad onn. Anc pli cler – numnadamain cun 81% ha la vischnanca decidì da reducir il sustegn finanzial per tractaments da dents: Be pli scolars che vivan en famiglias finanzialmain en las stretgas duain survegnir contribuziuns. E la cumpart dals custs che la vischnanca surpiglia, duai muntar a maximalmain 50% dals custs totals. La vischnanca vul spargnar, surtut perquai che questas contribuziuns èn sa dublegiadas aifer 10 onns.
Legenda: Vopna da Grono RTRGrono
Ils da Grono han tschernì la nova vopna communala: Cun 184 vuschs ha la «Legame armonico» gudagnà. Grono, Leggia e Verdabbio han fusiunà sin l’emprim da schaner 2017. La nova vopna è caracterisada tras ils trais fegls d’ischi da Grono e las colurs mellen e cotschen da Leggia e Verdabbio. La proposta cun il num «Tre identità in un unico scudo» ha survegnì 16 vuschs damain. Ella dueva unir en ina vopna in element da mintga vopna da las trais vischnancas avant la fusiun.
Legenda: RTRBregaglia
La constituziun communala da la vischnanca Bregaglia vegn revedida parzialmain. 338 votants e votantas han acceptà la revisiun e be 48 han refusà quella. La revisiun parziala duai simplifitgar la procedura da las elecziuns: Il president (sindaco) e la suprastanza communala vegnan da nov elegids il medem di l’avust ubain il settember. Fin uss eran quellas tschernas separadas.
Legenda: Vopna da Tusaun RTRTusaun
Il suveran da Tusaun ha cun 91% cleramain decidì in credit da 1,6 milliuns francs per sanar la segunda etappa da la Via Compogna. La radunanza communala aveva approvà il november passà unanimamain il credit. La part da Roza fin la Werkallee e gia vegnida sanada il 2018. Per il 2019 èsi previs da sanar il tschancun da la Werkallee fin la chasa da vegls. I sa tracta d'in tschancun da 400 meters.
Legenda: RTRFlem
La vischnanca da Flem ha approvà l’adattaziun dal contract da concessiun cun las ovras idraulicas Zervreila. Quai cun 89% GEA. Premess che era las ulteriuras vischnancas da concessiun din GEA a l'adattaziun dal contract, pon ellas vender autonom l'energia da participaziun davent dal 2023. Era tar la cunvegna che reglescha las valurs restantas dals implants electrics han ils votants e las votantas ditg GEA (cun 497 cunter 62 vuschs). Las midadas valan fin ils 31 da december 2037. Lura scadan numnadamain ils contracts existents.
Chantun Votaziuns ed elecziuns en Grischun
Ina survista dals resultats da las elecziuns e dals projects da votaziun en las vischnancas grischunas.
Parter
Parter