La finamira da l'inscunter è stà da discutar davart l'avegnir dal rumantsch: Co vegni a vesair ora cun il rumantsch en 10, 50 ubain 100 onns? La giuventetgna rumantscha han rimnà ideas e discutà davart ils basegns, ma era guardà enavos en regurdientschas da lur istorgia da 30 onns.
Be pauc interess per barat
La sonda suentermezdi han be var 9 persunas chattà la via tar il barat da la GiuRu. I saja grev da motivar la giuventetgna da s'engaschar per il rumantsch, argumentescha il vicepresident, Maurus Bundi. L'invit per l'inscunter ha l'uniun tramess a varga 200 persunas.
Novas structuras duain puspè purtar success
En l'avegnir vul la GiuRu restructurar l'uniun e crear gruppas da lavur per organisar projects. L'organisaziun survegn mintga onn 20'000 francs da la Lia Rumantscha. Cun quels pon els sustegnair projects ed organisar atgnas chaussas.
Dapi il favrer 2021 maina Naomi Arpagaus la Giuventetgna Rumantscha. A l'inscunter a Cuira n'è ella betg stada da la partida – ha dentant purtà in salid virtual da Brüssel. Sia finamira saja da promover il barat cun uniuns da giuventetgna, sensibilisar per minoritads e sustegnair projects innovativs da giuvenils rumantschs, aveva ella ditg tar sia elecziun.