La lavur da l’uffizi da stadi civil: Dal batten fin la mort

La Regiun Surselva festivescha il giubileum da 50 onns. Ils uffizis regiunals èn centralisads a Glion, tranter auter era l’uffizi da stadi civil.

In register da famiglia, pli baud ed oz. Bild in Lightbox öffnen.

Legenda da maletgs: In register da famiglia, pli baud ed oz. RTR, H. Giger

Incumbensa da lavur da 190 %

Silvio Caviezel da Vrin, collavuratur da l’uffizi da stadi civil, lavurava gia avant 20 onns en la medema funcziun; l'entschatta dentant tar l’uffizi da stadi civil da la vischnanca da Vrin. Da quest temp vegniva tut anc scrit a maun. L’incumbensa da lavur era 17 % (dasperas fascheva el il pur), oz saja quai 190 % per l’entira Surselva. Gia avant 20 onns avevan las vischnancas en la periferia da cumbatter cun il problem da paucas naschientschas. A Vrin avevan els schizunt naginas naschientschas da lez temp. La gronda lavur era, ch’ils burgais stuevan vegnir enavos en lur lieu nativ, sch’i deva successiuns da ierta.

Pli cumplitgada

La lavur dad oz saja vegnida – almain per part – pli cumplitgada, surtut cas cun persunas da l’exteriur. In pau lavur dettia era il contact cun requirents d’asil. Sch’in uffant naschia, hajan els savens nagins documents.

Nozzas civilas èn vegnidas pli simpaticas

Ina bella lavur sajan las nozzas civilas, di Silvio Caviezel. Pli baud era quai plitost ina chaussa formala cun suttascriver venderdi saira ils documents. Oz saja quai sa midà, perquai ch’ina gronda part na maridia betg pli en baselgia. Perquai fetschia l’uffizi da stadi civil ina ceremonia in pau pli simpatica e famigliara cun flurs e musica.

RR actualitad 11:00