La premia da l'Assicuranza d'edifizis dal Grischun (GVG) munta a partir da quest onn 17 raps per 1000 francs capital segirà. Quai è ina reducziun da 2 raps. Plinavant na datti a partir da quest onn betg pli la categoria «edifizis da lain». Uschia ch'il chantun Grischun da da nov be pli ina premia per edifizis. Quai annunzia l'assicuranza a chaschun da la presentaziun da la bilantscha annuala. La reducziuns saja pussaivla grazia a la buna situaziun finanziala cun avunda chapital da ristg en furma da reservas e d'agen chapital sco er investiziuns finanzialas rentablas.
Bajetgs da lain moderns sajan tenor prinzips e normas da bajegiar betg periclitads pli fitg da fieus e privels da natira che bajetgs «massivs». Perquai saja correct sch'il chantun Grischun, sco chantun da lain, tractia tut ils bajetgs tuttina. Per possessurs da bajetgs da lain munta quai ina reducziun da premia da 56%.
Nagina premia il 2021
L'Assicuranza d'edifizis dal Grischun ha regalà il 2021 a tut ils proprietaris e las proprietarias d'edifizis la premia d'assicuranza per metter in signal economic en temp da corona.
Il 2021 ha l'assicuranza fatg in gudogn da 36,1 milliuns francs. Ils donns totals èn stads tar 15,1 milliuns - 6 milliuns sut il budget. Il chantun Grischun n'è betg stà pertutgà uschè fitg da las malauras da l'onn passà sco auters chantuns. Entras la cuminanza da risico interchantunala, ha l'Assicuranza d'edifizis dal Grischun pajà 9,8 milliuns francs a chantuns ch'eran pertutgads fitg.
