Bruno Gantenbein surpiglia il timun tar Cuira Turissem, fin la fin da l'onn. Quai communitgescha l'organisaziun venderdi. El entschaiva gia glindesdi en in pensum parzial. En las proximas emnas saja alura il focus da chattar ina schliaziun permanenta per la successiun da Marc-Andrea Barandun.
Be dus mais en uffizi
Marc-Andrea Barandun, ha decidì da bandunar l'uniun sin agen giavisch ed en enclegientscha vicendaivla e quai suenter be dus mais. Quai ha il copresident da Cuira Turissem, Jon Andrea Schocher, confermà ad RTR.
Marc-Andrea Barandun è stà dapi il zercladur schef da Cuira Turissem. L'um da 39 onns è vegnì elegì da la suprastanza da l'organisaziun turistica. Barandun aveva surpiglià la successiun da Leonie Liesch ch'era stada passa 10 onns en uffizi. Glindesdi ha Barandun gì ses davos di da lavur. Ina nova plazza n'ha el anc betg.
Fin la fin da mars era Marc-Andrea Barandun directur da Bravuogn Filisur turissem ed er mainagestiun dal museum da trens Alvra. La suprastanza ha elegì el tranter auter er pervi da sias experientschas da manar e marketing, sco er pervia da sias enconuschientschas da l'hotellaria.