La sonda avantmezdi è in e-biker cupitgà a Haldenstein, datiers da l’implant da glera Oldis – cun esser da viadi sin in trutg stretg. Cun vulair sa tegnair vid ina chadaina che gida da sa tegnair per viandants, haja el pers la controlla e saja cupitgà var 20 meters sur ina platta da crap en il Rain. Quai scriva la polizia da la citad da Cuira.
L'aua ha tschiffà l'um da 51 onns, radund 100 meters plinengiu ha quel lura pudì sa tegnair vid in grip. In pestgader ch’era en la vischinanza ha lura dà alarm. La Rega ha spendrà l’um cun ina suga e sgulà el en l'Ospital chantunal a Cuira. Il ciclist è vegnì blessà mo levamain.
Legenda:
Il trutg nua ch'il ciclist è crudà sur la spunda.
Foto: Polizia chantunala GR