Durant la stad scuvra RTR lieus pli nunenconuschents en il Grischun. Quest'emna Casaccia en Val Bregaglia.
Il sulet hotel a Casaccia il hotel Stampa
Ina visita en il bus d'emetter ha er Menga Negrini fatg, ella maina l'unic hotel a Casaccia, il hotel Stampa. Il num deriva da la famiglia Stampa ch'era ina giada fitg gronda en Bregaglia. Il lieu cun il num Stampa sa chatta dentant bun 10 kilometers davent da Casaccia. Uschia che in u l'auter giast va magari a Stampa e tschertga là il hotel da Menga Negrini. Ella possia cunzunt beneventar giasts da la Belgia en ses hotel. Actualmain è il hotel plain.
Casaccia in vitg da transit
Casaccia è ina vischnanca tipica da transit. Las chasas dretg e sanester da la via chantunala èn chasas che mussan dentant l'impurtanza d'ina giada da la vischnanca al pe dal pass dal Malögia e dal Set. Quels temps èn «tempi passati». Viturins sa ferman schon ina pezza betg pli. Per paina sa ferman ussa viandants che vulan far la via panoramica enfin a Soglio ni che vulessan traversar il pass dal Set enfin a Beiva.
Ils stgars 70 abitants da Casaccia han dus auters privilegis. Els han sco sulets Bregagliots ina vista directa sin il mir da fermada Albigna e la planira è la pli gronda da l'entira val.
Da fusiuns e fusiuns
Casaccia ha fusiunà il 1971 cun Vicosoprano ed il 2010 è la fusiun da Bregaglia stà il proxim pass. Ussa è Casaccia ina da las tschintg fracziuns da la vischnanca Bregaglia.
RR actualitad 12:00