Siglir tar il cuntegn

Expediziun Grischun Fatschas da Flerden

Il president communal da Flerden è atgnamain da la Turgovia. A Flerden è el arrivà mo per lavurar sco selvicultur. Hanspeter Reimer fa or da la laina instruments spezials. Per trais giuvnas da Flerden, n'è il vitg dentant betg propi il «hit».

In caf - ma in bel caf

Amina Horber, Celina Müller e Gianetta Trinkler - trais giuvnas da Flerden. Per els n'è Flerden per il mument però betg gista in paradis. I na dat nagin lieu per ir en sortida, nauschas colliaziuns e la gronda part dals collegas che stattan en la val. En il vitg da muntogna na datti era nagina uniun da giuvenils. E cun quai ch'ellas lavuran tuttas en auters vitgs, na passentan ellas propi bler temp qua.

Ellas èn però era cuntentas ch'ellas èn creschidas si en il vitget. «Ins era bler dadora, enconuscheva a tuts - ina bella uffanza». Era sch'ellas vulessan per il mument plitost ir davent, turnar ina giada na saja betg exclus.

Celine Müller, Amina Horber e Gianetta Trinkler.
Legenda: Celine Müller, Amina Horber e Gianetta Trinkler. RTR, Flurin Clalüna

Tuns da l'Australia made in Flerden

Hanspeter «Hampi» Reimer fa dapi divers onns sez Didgeridoos. Quai èn instruments da lain che vegnan oriund da l'Australia. Perquai dovra el mo laina ch'el chatta en ils guauds da Flerden. El fascineschan surtut ils tuns da quest instrument. «Ils tuns bass creeschan in sun misterius. Vinavant na pon ins betg sunar ina melodia, mo dar in ritmus», di l'um plitost quiet. El ha era gia vendì ses didgeridoos, in grond affar n'hai betg dà ordlonder. Ils blers instruments pendan anc tar el a chasa.

Legende: Video Sunar didgeridoo abspielen. Laufzeit 0:53 Minuten.
Or da Actualitad video dals 18.07.2018.

Daniel Bürgi – president communal

A Flerden haja el chattà in lieu ideal per lavurar e per pigliar sez a maun insatge. Sco selvicultur ha el lura cumenzà a realisar atgnas ideas. Ed era en il vitg saja el spert stà integrà. Suenter bunamain 20 onns – l'onn 2011 – è el lura vegnì elegì sco president communal. «Els tschertgavan insatgi che vuleva surprender quel job. Jau aveva schon gì bler contact cun autras vischnancas, lura hai jau ditg gea».

Daniel Bürg.
Legenda: Daniel Bürgi: Oriund da la Turgovia, uss president communal da Flerden. RTR, Flurin Clalüna

RR actualitad 08:00