Kavithas Jeyabalan è in dals dus scrinaris a Peist. El deriva da la Sri Lanka ed è il sulet che construescha anc «Schanfigger Schlitten» ch'ins enconuscha er sut il num «Aroser Schlitten». El tegna anc sidretg questa tradiziun, malgrà ch'ella na rendia betg finanzialmain. Tranter 10 e 40 scarsolas per onn producescha «Kavi», sco quai ch'el vegn numnà da tuts a Peist.
Sch'ins ha ina da nossas scarsolas, lu han ins quella per almain 30 onns. Quai è la differenza tranter nossas scarsolas e quellas da Tavau.
Viver da sias scarsolas na po il scrinari dentant betg. Quai saja plitost ses hobi. Per el saja impurtant che la tradiziun da las scarsolas vivia vinavant.
Sia scrinaria ch'ha er num Kavi, producescha cunzunt mobiglias e cuschinas. Da quai po el – ch'è vegni da la Sri Lanka sco fugitiv e cun mauns vids – viver fig bain.
Ursi Beeli ha scrit in cudisch sur da Peist
Ursi Beeli vala tar ils da Peist in zic sco cronista dal vitg. Er perquai ch'ella è gia dapi radund sis onns vid scriver in cudesch da Peist e ses abitants. Ursi Beeli e ses um èn domadus creschids si sin la spunda stipa da Peist. Ella è dentant stada davent per l'emprendissadi e per la lavur. Saja suenter 10 onns dentant puspè turnada en la patria.
Gea, jau sun simplamain da chasa qua. Quai è mia patria.
L'idea per il cudesch è vegnida perquai che Peist sa mida. I n'haja nagina scola pli, nagina posta, sulet la stizun dal vitg e las duas ustarias pitschnas dettia quai anc.
Sper quai morian ils vegls ed ils giuvens giajan davent. Perquai vul ella mussar cun il cudesch il Peist dad oz. In Peist cun abitants fitg «urchigs» e fitg lavurus, dentant er fitg averts per nov. Ils abitants da Peist hajan prendì si glieud da la Bassa ch'è vegnida per star en il pitschen vitget da muntogna.
Peist viva
Er sche posta e scola èn davent. Peist saja anc fitg viv. I dettia differentas uniuns, sco per exempel quella da tiradurs, l'uniun da cura e traffic, il chor maschadà u er la gruppa da gimnastica. Quellas uniuns s'engaschian per il vitg e per ses abitants, uschia Ursi Beeli. I dettia adina puspè festas e blers inscunters e precis quai vul Ursi Beeli mussar e descriver en ses cudesch che duai lura cumparair l'atun.
RR actualitad 12:00