San Gaudenzio, ozendi ina ruina sur Casaccia, è stà in lieu impurtant da pelegrinadi. Il num ha la baselgia en stil gotic survegnì d’in missiunari che duess esser vegnì stgavazzà. El haja purtà sia testa en ils mauns 180 meters, fin en il lieu nua che la baselgia è vegnida construida pli tard.
La bar Sett è il lieu d'inscunter
L'ustaria pitschna a Casaccia è per ils indigens il lieu d'inscunters. Ed il num da l'ustiera è program. Sandra Engel è l'anghel da Casaccia. En mintga cas per tut quels che s'entaupan gugent en ustaria. La gievgia las dunnas da la vischnanca a café ed il venderdi saira ils umens.
La glieud appreziescha la purschida d'ina ustaria ed uschia capita mintgatant ch'i dat da mesanotg anc ina spaghettada. La portugaisa ch'è ussa dus onns a Casaccia sa senta sco da chasa a Casaccia e porscha in lieu d'inscunter als indigens.
Albigna – il mir da fermada
Il mir da fermada Albigna cun sia lunghezza da 759 meters ed ina autezza da 115 meters dominescha sin 2'100 meters sur mar la val ed en spezial il sguard direcziun sid dals abitants da Casaccia. Construì dal 1955 fin il 1959 da la ovras electricas EWZ è il mir en il fratemp daventà ina attracziun turistica. Ina pendiculara cun ina differenza d'autezza da 900 meters porta ils turists sper il lai e blers cuntinueschan il viadi direcziun chamanna Albigna. Mintga mardi èn collavuraturs pensiunads dal EWZ ils guids e mainan er en il mir da fermada.
RR actualitad 17:00
