Siglir tar il cuntegn
Inhalt

Expediziun Grischun Zorten e ses abitants

Pol Antoni Hartmann ha cun ses 90 onns vis co las duas fracziuns da Lai e Valbella èn creschidas. Zorten, Lain e Muldain èn plitost stads airi.

Pol Antoni Hartmann è stà president communal e president da la vischnanca burgaisa. Ed el ha vis l'entir svilup en la regiun. Co las duas fracziuns da Lai e Valbella èn creschidas ed il trio da Zorten, Lain e Muldain èn plitost stads airi. Co Pol Antoni Hartmann raquinta eran ils culms e las aclas da Zorten, Lain e Muldain a Lai. Tras il turissem da cura èn Valbella e Lai lura creschids fitg.

Josef Baltermi è or da la pli gronda famiglia da Zorten

Josef Baltermi è uss pensiunà e creschì si a Zorten cun 12 fragliuns. Cura ch'el era anc in uffant avevi enfin 100 uffants en il vitg. Ins s'entupava sin via, en l'ustaria dal vitg, avant la banca, la posta u la butia. Ed oz saja betg restà bler da quai. Il vegnir ensemen a dar ina discurrida manca er magari a Josef Baltermi che vegn numnà Jo en vischnanca. Il pensiunari giauda dentant tuttina la quietezza e fa magari ina spassegiada da Zorten enfin tar il lai da Lai.

Toni Parpan - il chau creativ da Zorten

Toni Parpan n'è betg gist la persuna ch'ins s'imagina en in vitg da gnanc 150 abitants sco Zorten. El è artist ed ha bajegià enturn in clavà vegl ch'el ha ertà. Mintg'onn vegn el durant ils mais da stad a Zorten per viver e lavurar vid projects. Quai savens ensemen cun collegas ch'el enconuscha da sia lavur sco scolast a la scola d'art a Bienna u dal studi d’art.

Ina chasa cun portas avertas

Ses clavà saja avert per tuts – perquai vegnan regularmain persunas sperasvi per realisar ensemen projects. Uschia han Toni Parpan e ses collegas gia creà bancs chasa, fatg exposiziuns en il vitg, mussà films u er dà pitschens concerts. Tut tgi che lavuria vid projects – saja quai in cudesch, maletgs, sculpturas, musica u auter, possia vegnir. La premissa saja dentant d’exponer u preschentar las lavurs a Zorten. L'artist da 39 onns giauda da savair lavurar a Zorten – qua saja tut nuncumplitgà.

Ils da Zorten giaudan il ruaus e vivan in zic per sasez

Cunzunt la quietezza è quai che plascha als da Zorten vi da lur vitg. En il vitg hajan ins la pasch. La gronda part dals abitants èn u pensiunads u ch'els van ordaifer a lavurar. Uschia ch'i marscha pauc u nagut durant il di.

Er uffants hai be pli paucs. A Zorten datti ni stizun ni ustaria – uschia ch'i na dat nagin lieu nua ch'ils indigens s'entaupan e sa discurran. Intgins dad els deploreschan quai. Ins haja mo pauc contact cun ils convischins. Uschia che mintgin vivia in zic per sasez.

RR actualitad 12:00