Siglir tar il cuntegn

Header

cuntegn

Acziun da vaccinar Suenter smanatschas: Naginas vaccinaziuns direct en scola a Cuira

Sper ina demonstraziun planisada, haja dà smanatschas massivas e mobilisaziun cunter l'acziun da vaccinar en scola. Pervia da quai reagescha la citad ussa cun virolar decentral. Ins vul uschia proteger giuvenils, persunal da scola e da virolar d’agitaziuns e smanatschas d'adversaris da vaccinaziun.

Per proteger giuvenils da las protestas vegn l’acziun da vaccinar, ch’era planisada per glindesdi, betg fatga sin l’areal da scola mabain decentral. Sco quai che la citad da Cuira communitgescha, èsi previs che tals giuvens e giuvnas che vulan il vaccin ed han il consentiment dals geniturs survegnan in termin tar in post da vaccinar e betg gist en scola. Questa decisiun sur notg argumentescha il cusseglier da la citad Patrik Degiacomi cun la mobilisaziun dad adversaris da la vaccinaziun per demonstrar enturn scolas, però era cun smanatschas massivas sin plattafurmas da communicaziun.

audio
Il cusseglier da la citad da Cuira Patrik Degiacomi cun las raschuns
ord Novitads dals 03.10.2021. Maletg: RTR archiv
laschar ir. Durada: 14 Secundas.

Talas smanatschas massivas hajan ins constatà sin la plattafurma «Telegram». Taluisa veglian ins proteger tant scolaras e scolars, sco era responsabels e collavuraturs da l'acziun da vaccinar.

Mo cun il consentiment dals geniturs

Il Cussegl da la citad punctuescha ch'i saja adina stà previs da pussibilitar la vaccinaziun a giuvens a partir da 12 onns, sche quels veglian ella e mo cun il consentiment dals geniturs. En gruppas da «Telegram» curseschan appels da far part a la demonstraziun da glindesdi a Cuira che pretendan ch'i saja stà previs da laschar vaccinar scolaras e scolars senza il consentiment dals geniturs. Quai ch'il cussegl da la citad cuntradì.

Demonstraziuns cunter vaccinaziuns

L'Uniun «Netzwerk Impfentscheid» organisescha la demonstraziun lubida cunter vaccinaziuns en scolas, sco il regiunal schurnal da SRF rapporta. Cun la demonstraziun vulan ils organisaturs retegnair scolaras e scolars dal stgalim superiur da sa laschar vaccinar. Il president da la citad da Cuira, Urs Marti, defenda la purschida da vaccinaziun da la citad. Scolaras e scolars dovrian la lubientscha dals geniturs per sa laschar vaccinar. Plinavant possia questa purschida simplifitgar il process da vaccinaziun en il chantun. La citad da Cuira ha approvà la demonstraziun cun la cundiziun che persunas na dastgan betg demonstrar sin ils areals da scola:

audio
Urs Marti, president da la citad da Cuira
ord RTR Audio dals 02.10.2021.
laschar ir. Durada: 16 Secundas.

Sco in commember da la gruppa da demonstraziun ha ditg envers il regiunal schurnal da SRF, na sa drizzia quella acziun betg cunter la vaccinaziun en general, mabain cunter la vaccinaziun d'uffants. Co questa demonstraziun saja organisada, e quantas persunas che vegnian a sa participar, n'è anc betg enconuschent.

Ord l'archiv

video
Marina Jamnicki prenda posiziun davart vaccinar en scola
Or da Telesguard dals 30.09.2021.
laschar ir. Durada: 2 minutas 44 Secundas.

RTR novitads 06:00

Artitgels legids il pli savens