En il center logistic da la Crusch Cotschna Svizra a Berna hai il mument grond travasch. Gidantras e gidanters voluntaris pacheteschan ora ils pachets (en total 59'400) cun rauba dal diever quotidian che las donaturas ed ils donatur han tarmess per la 23avla acziun «2 x Nadal».
Davent la fin da schaner reparta la Crusch Cotschna la rauba en Svizra. Cun las donaziuns da pachets online (en total 1'770) en ina valita da 224'000 francs finanziescha l'organisaziun caritativa projects d'agid d'enviern en la Bosna, la Erzegovina, la Moldavia ed en il Kirgistan, scriva l'organisaziun en ina communicaziun.
Nagina acziuns senza voluntaris
En total lavuran ils voluntaris radund 4'800 uras da pachetar or las victualias ed ils artitgels d'igiena regalads e da zavrar quai per che la rauba arriva uschespert sco pussaivel tar las persunas pertutgadas da povradad en Svizra. Senza la lavur dals voluntaris na fiss l'acziun «2 x Nadal» betg pussaivla, scriva la Crusch Cotschna.
L'acziun vegn purtada da la SRG SSR, Coop, Posta svizra e la Crusch cCotschna Svizra.
Er RTR è sa participà a l'acziun, tant a Cuira sco er en ils studios regiunals.
RTR novitads 08:00
