Il project
El ha chaschunà bleras notgs senza sien, discussiuns e rumpatestas – il patratg d’emigrar. 206 Rumantschas e Rumantschs han ristgà il pass ed èn ì davent. L’amur, la mar, la professiun u simplamain il gust d’ina aventura han carmalà els en terras estras. En l’Indonesia, l’Australia, ed il Canada – Rumantschs datti in pau dapertut. Lur istorgias èn durant in’emna tema tar Radiotelevisiun Rumantscha. Quai en il Telesguard, radio ed online.
La tschertga da Rumantschas e Rumantschs
Cumenzà ha la tschertga da las Rumantschas ed ils Rumantschs mez favrer 2015. Durant in di ha RTR emess contribuziuns davart il tema emigrar ed ha animà las audituras ed ils auditurs d’annunziar parents ed enconuschents che vivan a l’ester. Surtut geniturs han telefonà ed annunzià lur uffants ch’èn ids davent. Els han raquintà quant grev ch’igl è stà da prender cumià e co che la tecnica ha midà las pussaivladads da star en contact. Cun var 50 telefons è l’acziun stada in success ed RTR ha organisà in segund di d’acziun la fin da mars.
Tut las persunas ch’han annunzià insatgi u èn s’annunziadas tar RTR han gì la schanza da gudagnar in bon d’ir en vacanzas en la valita da 1‘000 francs. La finala ha la sort decidì. Adula Camichel da S-chanf ha gì cletg. Ella ha annunzià ses figl Reto Camichel che viva en il conturn da Kapstadt en l’Africa dal Sid. Adula Camichel ponderescha d’ir a visitar ses figl cun il bon ch’ella ha gudagnà.
Emna tematica tar RTR
Dapli
RTR ha publitgà tut quellas persunas sin ina charta mundiala interactiva. Cun 15 persunas avain nus fatg intervistas al radio e trais avain nus visità. Tut las contribuziuns èn ussa online e vegnan emessas l’emprima emna da november en il Telesguard ed en il radio tranter las 11.00 e las 12.00. Part dal project è ina reportascha multimediala ch’è era da chattar en quest dossier.