Cun strictas mesiras da sortir en l'entir pajais vul la Frantscha dar dumogn a la segunda unda da la pandemia da corona. Las restricziuns duain valair a partir da venderdi e cuzzar fin almain l'entschatta da december. Quai ha il president Emmanuel Macron annunzià la mesemna saira a la televisiun.
Il president ha declerà che las restricziuns sajan main severas che la primavaira. Uschia restan las scolas avertas. La glieud duai dentant lavurar vinavant, prioritad haja dentant la lavur davent da chasa. Bars e restaurants sco er butias cun artitgels ch'ins na dovra betg urgentamain ston dentant serrar. Plinavant duai puspè dar restricziuns da sortir per la populaziun sco gia la primavaira. Er da viagiar dad ina regiun en l'autra na duai il proxim temps betg esser senz'auter pussaivel.