Oz è stà mes emprim di tar il Belgischer Rundfunk, BRF. E gia sun jau stada d'udir live sin l'emettur en la Belgia da l'ost.
La chasa da medias sa chatta mo 10 minutas da mes hotel – „Den Berg hoch und die Strasse rechts rein, dann sind Sie da“ aveva declerà la dunna a la recepziun. En maun la turta da nusch. L’aura è grischa ed umida.
Sentiments da mes emprim di en chasa RTR (uss gia avant 4 onns) vegnan activads. L’emprima sesida da redacziun. Il venter che sa tira ensemen. In sentiment che jau enconusch bain – esser gnervusa.
Tema è suenter questa fin d’emna natiralmain il terror a Paris cun connex en la Belgia. Tge far? Co regiunalisar? Dumondas che jau enconusch era da mia lavur da mintga di.
Vus spetgais segir sin mes vocabulari ch'jau hai empermess. Gea, jau era ;) Na perstgisai. Jau hai dentant anc emprendì pauc u nagut. In pled ollandais ch'è restà a mai suenter l’ura en la redacziun da novitads è «DOVEN». Quai è ollandais e vul dir «tschorv».
Nus avain stuì rir – tut las novitads sa tractavan da Paris e Brüssel ed il terror. Ina novitad dentant era da l’uniun per tschorvadad che vul ina nova lingua. Ina novitad ch'è oz definitivamain ida sut – chapaivel en questa situaziun.
«Bun appetit» avess jau era gugent emprendì per ollandais. Ma d'ina vart discurran ils collegas dal BRF tudestg e da l’autra vart n'hai betg dà ina pausa da mezdi.
Entant èsi suentermezdi a las trais. Anc na fa mes venter betg il “knurra”…
E gea - jau hai schon anc mangià insatge - la tschaina en l'hotel Ambassador era fantastica. Qua in zic Foodporn per vus.
Ma basta – guardai e tadlai co che mes collegas dal BRF lavuran.
Dapli da mai – damaun. Lura sun jau per 2 dis en la chapitala da la Belgia, Brüssel. Quai vegn segir interessant. Il collega Alain Kniebs mussa a mai sia plazza da lavur ed il suentermezdi hai jau in termin cun l’ambassadur Siro Beltrametti. Fin lura, stai bain!