Dumengia (15-11-2015) part jau da l’Engiadina en Belgia.
Tge ma spetga là? Jau na sai betg. Ma jau m'allegr da chattar ora quai. Esser spontana è mia devisa.
Enstagl da rapportar per il Radio Rumantsch, vegn jau ad esser en gir durant in'emna per il «Belgischer Rundfunk». E vus pudais accumpagnar mai cun mes diari persunal da la Belgia: «Vio tranter trais».
Tranter 3 lieus. Eupen, là nua ch'il «Belgischer Rundfunk» sa chatta, è numnadamain situà en la Belgia da l’ost. Pli precis en il «Dreiländereck» da la Germania, l’Ollanda e la Belgia.
Bun per mai che ad Eupen vegn discurrì tudestg («franz» ha jau dà si suenter 1 onn). Ma quai na vul betg dir ch'ina lingua da la Belgia, numnadamain il flam, na vegnia betg ad esser part da mes diari.
Mintga di datti in pitschen vocabulari or da mes mintgadi. Vulain guardar, tge ch'jau emprend. E vus cun mai.
Ma basta, mes chars. Dapli da mai lura il pli tard dumengia saira, cura ch'jau sun en il hotel ad Eupen. El duess esser bel, il hotel.
Fin lura stai bain!
Jau pachetesch en mia valisch...
- La turta da nusch - per ils collegas da la Belgia (mia mamma ha fatg ella)
- Blue - mes pinguin, senza el na riv jau betg da durmir
- La bugliotta - quest'emna dastga be ella vegnir en letg cun mai
- Il microfon - adina cun mai