Siglir tar il cuntegn

Header

cuntegn

Vio tranter trais Stgalim da terror 3 ed jau entamez

Ils davos 2 dis sun jau stada en la chapitala Brüssel. Dapi ier, ils 17 november vala en la Belgia il stgalim da terror 3. Quai vul dir ch’in attentat è pussaivel e probabel.

E quai ha consequenzas: Betg mo per gieus da ballape u autras occurrenzas grondas. Cun raschun, sco quai che las persunas cun las qualas jau hai discurrì a Brüssel han ditg. «Tgi vul schon surpigliar la responsabladad, sch'insatge capita...»

Quai ma dumond era jau. E quant enavant va quai anc? Datti puspè ruaus, u capita la proxima catastrofa? Tge lura?

audio
Saira: Terror a Paris - la situaziun en Belgia
ord Actualitad dals 19.11.2015.
laschar ir. Durada: 5 minutas 45 Secundas.

Armada e polizia nua ch'ins guarda

L’emprim che jau hai vis cura che jau sun vegnida or da la staziun a Brüssel, ier en damaun è stà in schuldà armà – «Schwer bewaffnet» per bun rumantsch. Quai fa impressiun. D’ina vart pens jau: «Uss avess ins bain d’esser pli segir che mai.» Da l’autra vart dentant pens jau: «Quests extremists na han nagina tema, na paran d’avair da perder nagut, quels na sa laschan betg impressiunar da las acziuns da segirtad. Sch'i dat ina schanza, èn quels buns da nizzegiar ella.»

gasetta
Legenda: Lectura a bunura - las gasettas cugnuschan mo in tema quest'emna RTR/V.Rominger

Brüssel èn il center da l'interess

Minuta per minuta pon ins dir, datti ina nova novitad èn connex cun l’attatga da terror a Paris venderdi saira. Las gasettas da la Belgia n'enconuschan nagin auter tema. Era ils collegas schurnalists dal Belgischer Rundfunk a Brüssel produceschan in artitgel suenter l’auter en connex cun il terror.

La Belgia cun sia chapitala Brüssel è entamez tut la catastrofa. Molenbeek stat en il center da la publicitad. 92'000 persunas vivan en quest quartier che sa chatta radund 7 kilometers davent dal center da Brüssel e ch'è enconuschentamain in hot spot d’extremist islamistics.

Co è quai pussaivel ma dumond jau adina puspè e dumond era ils correspundents dal BRF a Brüssel, Alain Kniebs e Roger Pint. La politica haja guardà davent dian els avertamain. Ed ussa? Han ins la merda, pudess ins dir fitg salop, fiss la situaziun betg uschè tragica, betg uschè smanatschanta.

Cura èn ins suspectus?

Sin via, tranter la glieud, na ha jau surprendentamain badà nagut. Jau n'hai betg gì l’impressiun che la glieud è gnervusa, che la glieud ha tema. Ma jau sai, co jau ma sent. Betg uschè segira per esser sincera. Ed jau ma sun in per giadas dumandada: «Tge impressiun fatg jau sin la glieud enturn mai? En la metro ni en il bus?» Jau sun stada en gir cun 2 grondas tastgas. In maun hai jau gì en la giacca per segirar mia bursa. «Sun jau en quest mument suspectusa?» Jau na sai betg, ma jau hai gì blers da quels muments nua che jau ma sun dumandada: «Ma cumport jau uss suspectus?» Speranza betg.

Lura musica araba en la metro direcziun staziun nord da Brüssel per turnar ad Eupen. Jau ma sun girada en la direcziun da la musica – il telefon d’ina dunna giuvna cun faziel da chau ha sunà. Paranoid? Jau ma sun vulvida? Sentiments, patratgs, in tranter l’auter - adina puspè.

Ed jau crai sinceramain, ad auters na vai betg auter che a mai. Gist sch’ins è qua en la Belgia uschè dasperas a tut. Sch’ins è en Svizra e tut anc «lunsch davent». Ma era là – quant ditg anc?

«Nur in der Schweiz ist man sicher», ha ditg in collega dal BRF ier durant la tschaina. Tema numer in era là: il terror e la dumonda: «Co enavant sin quest mund?»

Damaun sun jau en gir sur ils cunfins. Cunfins sco quel dad Aachen. Cunfins ch'èn uss occupads dal militar e da la polizia.

Pleds enstagl da fotografias

Forsa sa dumonda in u l’auter da vus che ha legì quest text: «Pertge na ha ella betg fatg intginas fotografias?» Jau hai vulì, sun dentant vegnida admonida da mes collegas dal BRF da betg far fotografias dal militar u lieus ch'èn serrads. Jau sun mo en gir cun mieu telefonin ed jau chapesch che quai fa ina curiusa impressiun sin las truppas spezialisadas ed autra glieud. E per esser sincera, na ma chat jau sezza betg bain en quella situaziun. Uschia che jau ha laschà star.

Artitgels legids il pli savens