Perquai che bleras da las cussegliaziuns en connex cun mesiras repressivas per motivs da provediment hajan pudì vegnir terminadas, n'hajan ins betg cuntanschì il record dal 2019. Tenor l'Uffizi da servetsch social dal Grischun era il maximum da cussegliaziuns activas l'onn 2019, tar 763 cas. Ch'ins ha pudì terminar 95% dals cas pervi da mesiras repressivas, ha er da far cun quai che questas persunas hajan survegnì ina contribuziun da solitaritad da la Confederaziun ed uschia haja lur dossier pudì vegnir mess ad acta. Actualmain vegnan anc 22 persunas cussegliadas en connex cun las mesiras repressivas.
Blessuras corporalas sco delict il pli frequent
Dals 714 cas da cussegliaziun activs sa tracti da 692 cas da persunas ch'èn pertutgadas da violenza. Ed entaifer questa gruppa èn blessuras corporalas cun 313 cas, il delict il pli preschent. Blers cas da violenza capitan a chasa tras il partenari (65%) u la partenaria (7%) ubain insatgi auter ord la famiglia (28%). Il dumber da cas da violenza a chasa è creschì per 9.5% cumpareglià cun l'onn avant sin totalmain 323 cas.
Tar ils ulteriurs cas sa tracti da extorsiuns, smanatschs e persunas ch'èn vegnidas sfurzadas da far insatge. Sco terz pli frequent delict suonda la violenza sexuala e lura anc blessuras en il traffic ed autras circumstanzas nua che persunas èn daventadas victimas.
Studi davart violenza a chasa: 4 da 10 dunnas pertutgadas
4 da 10 dunnas èn gia ina giada stadas pertutgadas da violenza a chasa. Quai mussa in studi da l'institut da retschertga Sotomo. Uschia inditgeschan 42% da las dunnas e 24% dals umens dad esser stads pertutgads. 15% da las dumandadas e dals dumandads han inditgà dad esser stà delinquent. Sco motivs per la violenza vegn numnà l’alcohol, l’atgna experientscha da violenza, d’avair il dretg dad insatgi ni in purtret tradiziunal da la dunna. Per la gronda part da las persunas dumandadas n'è violenza a chasa betg tolerabla – ed igl è il motiv numer 1 per sa separar.