Siglir tar il cuntegn

Header

video
Puras e purs grischuns fan da piunier e vulan producir neutral al clima
Or da Telesguard dals 20.10.2021.
laschar ir. Durada: 3 minutas 35 Secundas.
cuntegn

Agricultura neutrala al clima 50 purarias grischunas reduceschan CO₂ e fan lavur da piunier

Teorias, co reducir emissiuns nuschaivlas al clima en l’agricultura, datti bleras. I manca però la practica. 50 manaschis grischuns fan dapi l’entschatta da quest onn lavur da piunier. Els fullan via ed emprovan, co la pratica funcziuna.

Co ch’il project «agricultura neutrala al clima Grischun» progredeschan, han ils responsabels preschentà oz a maun da trais manaschis en il Plantahof a Landquart. Fin il november èn ins anc londervi dad eruir a maun d’in tool quantas emissiuns nuschaivlas al clima ch’ils singuls manaschis da piunier emettan. Ils manaschis pon lura gist sezs far propostas e vegnir cun ideas co ch’els lessan reducir emissiuns sco CO2 u metan.

Fin il 2025 sa chattian ins en la fasa da pilot nua ch’ins veglia rimnar experientscha cun ils emprims 50 manaschis, di Claudio Müller, co-manader dal project. Suenter, fin il 2030, veglian ins lura integrar anc dapli manaschis che pon profitar da las experientschas dals piuniers. En tut vul ins impunder diesch onns per il project.

Interess da grossists

La finamira: Il Grischun duai daventar l’emprim chantun che cultiveschia sin in vast champ products neutrals al clima. Quai saja ambiziuns, concedan ils manaders. Ma ils resuns sajan ordvart positivs. Ins s’interesseschia era ordaifer il chantun persuenter, di Daniel Buschauer da l’uffizi per agricultura e geoinfurmaziun che fa part dal timun dal project. El è persvadì che blers consuments lessan cumprar products neutrals al clima.

I dat gia oz grossists che tschertgan manaschis che produceschan neutral al clima
Autur: Daniel Buschauer Uffizi per agricultura dal Grischun

Il grond avantatg per l’agricultura grischuna saja ch’ella gudognia savida pertuccont il clima. I saja meglier da recaltgar gia oz experientscha, pertge in di vegnia quai segir perscrit che l'agricultura stoppia producir a moda favuraivla al clima. Lura possedian ils purs grischuns gia la pratica necessaria.

audio
Co l'agricultura duai daventar neutrala al clima, p.ex. Tinizong
ord Actualitad dals 20.10.2021.
laschar ir. Durada: 3 minutas 25 Secundas.

Commerzi cun certificats da CO2?

Ponderaziuns davart il commerzi cun certificats da CO2 fetschien part da la fasa da pilot, di Daniel Buschauer. Forsa dettia quai pussaivladads da stgaffir ina plattafurma nua ch’ils manaschis grischuns possian vender direct lur certificats.

Suenter il traffic, l’industria ed ils perchasas è l’agricultura il sectur che emetta en Svizra ils pli blers gas nuschaivels al clima. I na sa tracta betg exnum dad emissiuns da tractors u maschinas, mabain era dad emissiuns dal muvel, dal terren u da grascha.

«Klimagipfel» per in e scadin

Per infurmar la populaziun davart ina agricultura neutrala al clima, datti ils 30 d’october al Plantahof in «Klimagipfel» per ina e scadin. Cabaret, films, podis e referats stattan sin il program. Ina referenta è Anita Idel che ha scrit il cudisch «Die Kuh ist kein Klimakiller!». La scienziada è stada conautura dal rapport mundial agrar da l’ONU dal 2005 fin 2008.

RTR actualitad 17:00

Artitgels legids il pli savens