Aixa Andreetta ha demissiunà sco secretaria generala da la Pro Grigioni Italiano sin la fin da fanadur, quai scriva l'organisaziun che promova la lingua taliana en il Grischun. Dapi il settember 2019 è Aixa Andreetta ch'è oriunda da la Mesolcina secretaria generala da la PGI. Ella chala ord motivs famigliars suenter la naschientscha da ses figl. Actualmain ha Andreetta congedi da maternitad.
Sco secretaria generala saja ella stada ferm involvida – per exempel en l'elavuraziun dal concept dals «Giornate grigionitaliane». Quest project intenda d'avischinar ed unir las regiuns talianas dal Grischun.