Mezdi: Di da rumantsch – i dovra ina nova plattafurma per documents
Da Actualitad dals 09.11.2017

A la radunanza generala da la Conferenza generala Surselva a Glion èn las pli che 160 scolastas e scolasts preschents vegnids infurmads, che la pagina d'internet Center didactic online (CEDID) vegn serrada il fanadur 2018. Quella pagina han las trais conferenzas generalas dal Grischun (Conferenza Generala Ladina, Conferenza Generala Surselva, Conferenza rumantscha Grischun central) lantschà l'onn 2009 per che scolastas e scolasts possian barattar simpel e spert fegls da lavur ch'els han translatà ni schizunt creà sezs. La pagina sezza vegn administrada da educa.net, ina instituziun communabla da la Confederaziun e da la Conferenza svizra da directuras e directurs chantunals d'educaziun. Causa ina restructuraziun ha educa.net uss infurmà, ch'il CEDID vegn serrà il fanadur 2018.

Naginas discussiuns

Quella infurmaziun n'ha betg chaschunà discussiuns tar las scolastas ed ils scolasts da la Surselva. Per il president da la Conferenza generala Surselva Francestg Friberg è quai nagina surpraisa. La plattafurma na saja betg vegnida duvrada savens, dapi il 2009 sajan vegnids chargiads mo 208 documents, ed i dettia era alternativas al CEDID. Quels 208 documents sajan segirads ed uss saja da chattar ina schliaziun co metter a disposiziun els en l'avegnir.

L'incumbensa da chattar ina schliaziun ha l'anteriur scolast Conradin Klaiss. Tenor el datti gia ina varianta pussaivla cun ina plattafurma existenta, el veglia dentant anc evaluar autras pussaivladads. Impurtant saja ch'i dettia mo ina plattafurma che uneschia tut las purschidas existentas. Prescha na fa ina decisiun anc betg, cunquai ch'il CEDID vegn stizzà pir il fanadur 2018.

RR actualitad 12:00