Il cussegl communal da San Murezzan ha deliberà gievgia saira il budget 2018 da la vischnanca per mauns da la radunanza communala. Il budget prevesa sortidas ed entradas da radund 77 milliuns francs. Tar las sortidas pon ins ussa budgetar radund 1,5 milliuns francs damain. Quai surtut suenter ils sbagls da las calculaziuns dal chantun Grischun tar la gulivaziun da finanzas. Uschia è il quint da San Murezzan ussa egualisà e prevesa in pitschen gudogn da radund 100'000 francs. Il cussegl communal ha era decidì ch'il pe da taglia duai restar tar 60% da la taglia chantunala.

Investiziuns da radund 170 milliuns francs

Fin l'onn 2022 prevesa San Murezzan grondas investiziuns sco per exempel la nova serenera regiunala en Engiadin'Ota, la nova chasa d'attempads Du Lac e la renovaziun da la chasa da scola. Tut las investiziuns han in volumen da 170 milliuns francs. Quai vul dir che San Murezzan vegn a duvrar chapital ester da radund 130 milliuns francs. Uschia na vegni betg pli ad esser pussaivel da betg surpassar la finamira maximala da 50 milliuns debits.

RR novitads 06:00