Suenter che la Lia Rumantscha ha preschentà l'october ils resultads d'ina retschertga che mussa, ch'ils Rumantschs vulan ina gasetta quotidiana, fa la Lia Rumantscha puspè dumondas a Rumantschas e Rumantschs. Quella giada miran els en l'avegnir enstagl enavos.

Bunura: Proxim pass per las medias rumantschas
Da Actualitad dals 08.12.2017

Campagna cun questiunaris e lavuratoris

La campagna duai manar la Lia Rumantscha en vals e vitgs, declera il secretari general Martin Gabriel. L'idea è dad esser preschent a partir dal schaner 2018 ad occurenzas en la Rumantschia ed uschia cuntanscher er la basa dals Rumantschs. Ensemen cun ina gruppa da lavur cun il num «gruppa creativa» ha la Lia Rumantscha dà il culp da partenza per il project «Medias rumantschas 2019». La gruppa sa cumpona da represchentants ord uniuns rumantschas sco per exempel la Giuventetgna Rumantscha, la Surselva Rumantscha u er l'Uniun dals Grischs.

Esser preschent en l'entir territori

Sco Martin Gabriel di, saja l'idea dad ir ad occurenzas cun ina campagna e là udir ils avis dals Rumantschs areguard las medias rumantschas.

«  Jeu sai metter avant, d'esser preschent cun in stan a la fiera da vinars a Glion ed infurmar sur da nossas acziuns.  »
Martin Gabriel
Secretari general Lia Rumantscha

Plinavant punctuescha Gabriel er, ch'ins veglia sa drizzar activamain ad uniuns, instituziuns e scolas per savair far là lur retschertgas. Ina sfida saja segir da cuntanscher giuven e vegl. Tar glieud pli passada savess el dentant metter avant da sa metter en contact cun chasas d'attempads e recaltgar uschia ils avis. Sin questa moda e maniera ch'è fitg datiers al pievel rumantsch spera la Lia Rumantscha d'avair ina buna basa da datas per pli tard – circa il zercladur 2018 vul ella elavurar ils emprims resultats.

RR actualitad 17.00