Dapi l'entschatta da l'onn è Gieri Spescha cun sia firma l'administratur da la marca «graubünden». En quai onn ha el cunzunt visità blera glieud e discutà davart l'idea ed il futur da la marca. El ha dentant betg be visità exponents dal turissem, mabain er d'auters secturs. En quels discurs ha el sentì bler sustegn per la nova direcziun ch'el less ir cun la marca.

Bunura: Marca Grischun - Bleras destinaziuns desistan
Da Actualitad dals 08.12.2017

Ils gronds mancan

Dentant il mument è la marca anc colliada fitg stretg cun destinaziuns turisticas che fan reclama cun il capricorn. Las grondas destinaziuns sco Arosa, Laax, San Murezzan u er Claustra Tavau na fan dentant anc adina betg reclama cun il logo tetgal. Quai na saja dentant betg in problem, manegia Gieri Spescha. Tier marcas na giaja quai numnadamain betg be per il logo. Er quels ch'hajan in'atgna direcziun fetschian tuttina part dal Grischun ed uschia er da la marca è el persvas. Mintgin sappia far reclama sco el vul.

Ed er che Spleia Tambo na less betg pli far part saja en urden, ins na sforzia nagin da far part. Tuttina è Gieri Spescha persvas che la marca porta insatge a quels che fan part, els pon preschentar lur products e purschidas sut in tetg. In tetg cun cornas da capricorn ch'haja in image fitg positiv. Ed en il futur duain er auters secturs sper il turissem pudair profitar da quest image.

RR Telesguard 17:40