La chadaina d'infecziuns na va betg be da persuna a persuna, mabain er da carstgaun tar animal e puspè enavos tar il carstgaun. Cura ch'il virus siglia d'in animal a l'auter possia quai dar variantas che fetschian quitads, declera il virolog da l'universitad da Turitg, Cornel Fraefel envers la Rundschau da SRF. Animals selvadis hajan perquai in grond potenzial en la pandemia, però en il senn negativ.
Virus che vegnan avant tar animals selvadis na pon ins betg pli extirpar. Quai vegn anc vitiers.
La dumonda è pia: Cursescha Covid gia tranter la selvaschina? En Svizra na san ins anc betg – en l'America dal Nord pon ins respunder quella dumonda cun Gea. Ils tschiervs da Virginia (Weisswedelhirsch) vivan en ils Stadis Unids ed il Canada per part fitg datiers da l'uman. Quels animals selvadis sa cumportan uschè domesticads ch'els mangian ord dal maun da carstgauns, sco igl è da vesair en la Rundschau da SRF. Sco il virolog di vinavant, possian ins ir da quai anora ch'il virus saja sa sviluppà aifer l'animal e ch'il virus saja vegnì entras quai pli contagius.
Igl è pussibel ch'il sistem d'immunitad dal carstgaun n'enconuscha betg pli las novas variantas dal coronavirus ch'èn sa sviluppadas en l'animal.
Cursescha Covid gia en la natira svizra?
Per chapir la dinamica da la pandemia vegnan animals selvadis da l'entira Svizra analisads sin Covid – er dal Grischun. L'institut per sanadad da selvaschina da l'universitad Berna vul analisar fin la fin dal 2023 tut en tut 1'000 animals selvadis, 60 da quels dal Grischun. L'emprim hajan ins ponderà tge animals ch'hajan il pli tgunsch cun il virus. Che la vulp vegnia en contact cun il coronavirus saja il pli probabel. Enfin uss èn tuts tests da PCR tar animals selvadis stads negativs.
Er ils uffizis da chatscha chantunals èn involvids en il project naziunal. Però, sulettamain per furnir las provas da sang. Dal Grischun giavischia l'institut a Berna tut en tut 60 provas. 30 da quellas da vulps, e 30 da fiergnas e tais, ha declerà il manader da l'Uffizi da chatscha Adrian Arquint. Aposta na vegnian nagins animals sajettads.
Il project va enfin la fin dal 2023. Tge ch'i muntass, sche la selvaschina en Svizra avess Covid, n'è il mument anc betg enconuschent.