La chasa da parcar Arcas a Cuira vegn sanada ed è perquai betg accessibla per radund 8 mais. Quai vala er per ils parcadis sur la garascha. Cumenzar a bajegiar vul la citad ils 2 da matg da quest onn. Ils onns 2002 fin 2006 è la chasa a parcar vegnida sanada e renovada. Il 2018 e 2019 han ins plinavant adattà tut a las prescripziuns da protecziun da fieu actualas e la glisch è vegnida remplazzada.
Perquai ch'igl ha dentant dà in augment d'aua ch'è vegnida en la garascha, è l'entir bajetg sutterran vegnì examinà il 2018 e 2019 sin ses stadi e la substanza da bajegiar sco er pussaivlas materias nuschaivlas. Questa examinaziun haja mussà che la garascha ademplescha a moda funcziunala las pretensiuns, tuttina sajan mesiras per mantegnair la garascha necessarias.
Start da construcziun il matg
Las lavurs da sanaziun cumenzan ils 2 da matg 2022 e vegnan a cuzzar radund 8 mais. Durant quest entir temp da construcziun na stattan a disposiziun nagins da quels parcadis. Per tgi ch'ha a tschains in dals parcadis, hajan ins chattà ina schliaziun transitorica. En connex cun las lavurs vegnan er ils molocs sanads.
Las tualettas publicas, sco er ils parcadis per mopeds restan en funcziun. Er la colliaziun per peduns da la plazza Arcas al Plessurquai resta accessibla.