Il suveran da Cuira ha decidì la dumengia cleramain da cumprar l’areal da la caserna da la Confederaziun. La caserna duai vegnir bajegiada nov a l’ur da la citad. Nua che la caserna è actualmain, po la citad uschia planisar in nov quartier.
Blera influenza sin las ideas co nizzegiar l’areal da la caserna ha era il svilup en il quartier Cuira vest. Quest quartier è creschì fermamain il davos temp. Cunquai ch’i dat là pli blers abitants, duai vegnir construida ina scola sin l’areal da la caserna, ch’è datiers da Cuira vest. Il planisader dal territori, Beat Aliesch, che n’è betg cumpiglià tar il project da la caserna, vesa sin l’areal surtut il potenzial per spazi d’abitar. Perquai che Cuira vest haja gia avunda spazi per lavurar, uschia na dovria quai tenor el betg pli tant sin l’areal da la caserna.
Era spazi public impurtant
Sper la scola e l’abitar è tenor Beat Aliesch era il spazi public impurtant, quai dovria per avair ina buna qualitad da viver en la citad. Tar il spazi public tutgan per exempel spazis verds, plazzas da gieu u lieus per la cultura. Tant il planisader dal territori sco era la citad ed il chantun èn da l’opiniun ch’i saja impurtant da stgaffir sin l’areal ina cumpart spazi public.
Il spazi public è in punct absolutamain central.
Areal pir liber il 2031
La citad ha ussa temp da planisar co nizzegiar l’areal. Quest vegn pir liber en 10 onns. Sco emprim sto la Confederaziun planisar e realisar la nova caserna sin il Rossboden a l’ur da la citad. La midada po vegnir fatga il pli baud l’onn 2031.
Clera decisiun dal suveran da Cuira
La votantas e votants da la citad da Cuira han ditg la dumengia cun 80,38% cleramain Gea a la cumpra da l'areal da caserna amez la citad. Uschia vegn l'entira infrastructura militara spustada sin l’areal dal Rossboden.