Siglir tar il cuntegn

Header

cuntegn

Armada verda Il VBS reducescha emissiuns da CO2

Er a Cuira s'engascha l'armada per plazzas da sajettar che duain esser in'oasa biodiversa.

Il Departament federal da defensiun, protecziun da la populaziun e sport, VBS, vul cuntanscher il pli tard il 2050 ina bilantscha equilibrada da CO2. Quai cun vehichels electrics, carburants ecologics, stgaudaments alternativs ed implants solars. Mardi ha la ministra da defensiun Viola Amherd preschentà il concept directiv per l'ambient da ses departament ed in emprim plan d'acziun per energia ed clima.

Biodiversitad amez la plazza d'armas
Legenda: Biodiversitad amez la plazza d'armas Cussegliera federala Viola Amherd ed il colonel Patrick Huber passan sper il biotop da la plazza d'armas Chamblon en il chantun Vad nua che la ministra da l'armada ha preschentà il plan d'acziun 'energia e clima'. Keystone

Grond potenzial da respargn

3'700 terajoule energia dovra il Departament federal da defensiun, protecziun da la populaziun e sport mintg'onn. Uschè bler sco la citad da Schaffusa. E cun in sbuf annual da circa 200'000 tonnas CO2 è la passida ecologica dal VBS pulit marcanta. Dumandada è qua cunzunt l'armada. Cun las casernas e plazzas d'armas, ils vehichels e chars armads sco era cun ils aviuns è ella responsabla per 98% da tut il sbuf da CO2 dal departament. Per realisar quel, quinta il VBS cun custs da radund 650 milliuns francs fin il 2030.

audio
L'Armada svizra duai vegnir pli verda
03:37 min, Actualitad dals 31.08.2021.
laschar ir. Durada: 03:37 minutas.

Plazzas da l’armada sco oasa biodiversa

Dapi il 2004 s’engascha l’armada cun il project «Natira, cuntrada ed armada» (NLA) – tranter auter sin plazzas da sajettar – per l’ambient. Ina da quellas plazzas da sajettar che duai esser ina oasa biodiversa è il plaz da l’armada a Cuira. Il plaz da sajettar Rossboden, Rheinsand e la spunda vid il pe dal Calanda porschan in funs per fluras ed animals rars, quai conferman Max Gasser e Peter Weidmann dal project NLA.

audio
Plazzas da l'armada sco oasas biodiversas
03:40 min, Actualitad dals 31.08.2021.
laschar ir. Durada: 03:40 minutas.

Premissas per in prà biodivers 

Premissas per ch'in prà possia daventar biodivers, sajan ils suandants: Nagin guaud, il prà sto survegnir bler sulegl ed el na dastga betg vegnids duvrà intensivamain da l’agricultura. E quellas premissas sajan dadas sin l’areal dal militar, di il botanicher Max Gasser.

Damai che l’armada sajettia tranter auter sin la spunda cun muniziun traglischanta, che pudess entschaiver a brischar, vegni guardà ch’il pastg na saja betg memia aut e ch’i n'haja naginas chaglias u plantas che pudessan pigliar fieu – in paradis per fluras ed animalets.

Fieus controllads

Per part vegn era ina part dal prà brischada a moda controllada per evitar ch’el piglia fieu da sez. E quai saja in funs fitg fritgaivel che dat spazi a fluras pli flaivlas. Uschia po ina sort rara d’orchideas crescher sin quest plaz, di Max Gasser. Ed era ils animals han plaschair da las novas fluras. Uschia dettia spazi da viver per raras sorts, sco per exempel ina speziala sort da salips, di Peter Weidmann.

Malgrà ch'i dettia anc ina duas chaussas ch’ins pudess meglierar per promover la biodiversitad, sco per exempel il temp che las nursas pasculeschan en il medem lieu, sappian ins dir ch’il plaz da l’arma a Cuira è ina oasa biodiversa, dian Max Gasser e Peter Weidmann. Pertge la cumbinaziun tranter in prà senza guaud e chaglias e d’in prà che na vegn betg nizzegià intensivamain da l’agricultura saja fitg rara en Svizra.

RTR novitads 11:00

Artitgels legids il pli savens

Scrollar a sanestra Scrollar a dretga