Curt e concis

La suprastanza da la plaiv da Rueun, Ruschein, Siat e Pigniu ha survegnì ina dumonda d'in convischin da Siat, sch'ins pudess forsa meglierar la situaziun cun il tutgiez da Siat. Surtut il tutgiez la damaun da las 05:30 saja in disturbi. A Siat vegn tutgà trais giadas a di: la damaun, da mezdi e la saira. Spert èsi stà cler che quai convischin n'è betg il sulet che vegn disturbà dal tutgiez.

«  Igl è in grond, igl è in ferm tutgiez, in che fa la detga canera.  »
Convischina da Siat

Perquai ha la suprastanza da la plaiv clamà ad ina radunanza extraordinaria per decider sur da las pussaivladads, co ins pudess far pli miaivel il tutgiez.

Bunura: Zains da la baelgia da Siat èn baud pli da bass
Da Actualitad dals 05.02.2018

Isolar il clutger enstagl da smetter da tutgar

La decisiun è crudada sin la varianta dad isolar il clutger baselgia endadens per absorbar il tun. Quella pussaivladad vegn beneventada dals da Siat, uschia che la plaiv ha ussa laschà offrir ina firma spezialisada, quant che quai custass dad isolar il clutger.

La dumonda dal tutgiez ha betg spartì ils da Siat. Anc n'èsi betg enconuschent, quant che quai vegn a custar d'isolar il clutger da Siat. Era la dumonda, tgi che paja quant, n'è betg anc sclerida.

RR actualitad 08:00