Or da la plazza da teater a Cuira è daventada ina riva dal mar. Dretgas palmas, 60 tonnas sablun ord il Rain ed in pitschen pool duajan crear in’atmosfera da vacanzas. Quai è la culissa per la beach party, organisada da l’uniun khur.ch.
Festa alternativa
Atgnamain fiss questa fin d’emna la festa da la citad da Cuira. Causa corona è quella dentant vegnida spustada gia per la segunda giada. Curt suenter quella decisiun ha l’uniun khur.ch decis d’organisar la beach party sco festa alternativa.
Quasi vendì ora
Per saira dastgan vegnir sin l’areal maximalmain 750 persunas. Quellas ston esser vaccinadas u avair in test negativ ubain esser guaridas. La festa dura dals 11 fin ils 14 d'avust.