Stgazis da famiglia
Diaris, brevs e fotografias dals antenats – da quels stgazis sa chattan bleras giadas si surchombras u en tschaler. In'autra pussaivladad fiss da dar quels documents ad in archiv cultural. Lura possian ins esser segir che quels documents impurtants na giajan betg a perder, di Rico Valär. El è professur da romanistica a l'Universitad da Turitg ed è sez sa fatschentà cun differents relaschs. El ha manà la discussiun cun Duri Bezzola e Corina Blättler en la Biblioteca Chantunala a Cuira.
Riet e Maria Campell
Duri Bezzola ha scrit in cudesch davart ses basat e sia basatta Riet e Maria Campell. Per quest motiv è el sa fatschentà intensivamain cun ils relaschs da sia famiglia.
Atgnamain vulev'jau scriver in cudesch sur da mia mamma. In motiv daco ch'jau sun decis encunter è perquai che la distanza mancava.
I saja impurtant da savair tge ch'è «fact» e tge ch'èn raquints, di Rico Valär. Bleras giadas n'haja la persuna che raquinta da sia vita u ils confamigliars betg avunda distanza.
Infurmaziuns per la famiglia
In'autra descendenta da la famiglia Campell è Corina Blätter. Ella è sa fatschentada dal diari dad Uorschla Bisaz-Campell, la sora da Riet Campell. Quellas infurmaziuns èn dentant restadas en famiglia e vegnidas translatadas per tudestg per ils descendents che na chapeschan nagin rumantsch.
Sch'ils documents da famiglia raquintan da la vita da mintgadi, quitads, plaschairs, e la situaziun da famiglias, lura è quai impurtant e relevant.
Tge ch'ils trais raquintaders da la saira menziunan tuts, è il temp. Ins dovria blera peda sch'ins veglia sa fatschentar intensivamain cun relaschs da famiglia e sco in auditur di, fetschia quai schizunt in zichel dependent. Ins veglia numnadamain adina savair dapli e tschertgia ils tocs dal mosaic che manchian, per ch'i dettia il davos in maletg cumplain.