Ina chascha da laina cun en bustas, quellas èn emplenidas cun sems, tut è ordinà tenor flurs, verdura ed ervas. Mintgin, betg mo clients e clientas da la biblioteca da la citad da Cuira, pon vegnir en la biblioteca da semenza a purtar e prender sems. Impurtant saja, che la semenza è biologica e betg tractada geneticamain. La biblioteca lavura ensemen cun la gruppa da permacultura, ina organisaziun che sa concentrescha sin la persistenza en l'orticultura ed agricultura. Ina collavuratura da permacultura controlla regularmain la biblioteca da semenza, per guardar sche tut ils sems correspundan a las perscripziuns.
Nus badain che la glieud chatta quai interessant perquai ch'igl è insatge nov en nossa regiun.
Semnar, flurir, racoltar
Uss, durant la primavaira vegn la gronda part da la glieud a prender sems per semnar en lur agen iert, ha Julia Wäger observà. Durant la stad laschan els crescher tomatas, finotg, basilic, calendulas e autras plantas. Per survegnir ils megliers sems dovran ins in zic disciplina da sai stess. In exempel saja, da betg racoltar la salata la pli bella, percunter laschar flurir ella e rimnar ils sems. Per mantegnair spezias èsi impurtant da parter quests sems cun auters e purtar ils sems en la biblioteca da semenza.
La finamira é, da promover spezias indigenas e veglias ch’en preziusas. D’atun spetga la biblioteca che tants sems vegnan mess a disposiziun a la societad e uschia far effect cunter la perdita da spezias.
