Questa fin d'emna han las bibliotecas da la Svizra envidà la populaziun al «Biblioweekend» per far attent sin ellas.
Bibliotecas èn in lieu per mintgina e scadin. Betg be per studentas e students u insatgi che tschertga insatge spezial – mabain per tuts.
Program per famiglias a Cuira
La biblioteca da la citad da Cuira ha mess ensemen la dumengia in program per famiglias. Per exempel: dar memory cun mesirar il temp, far ligns nua ch'ins ha da tschertgar las schliaziuns en l'entira biblioteca, zambregiar mascras d'animals u dar tuts ensemen il grond gieu da scalas che va ina giada atras l'entira biblioteca enfin si en la segunda auzada.
Propi bleras visitadras e visitaders n'hai da quest bellezza di dentant betg dà. E quellas e quels ch'èn vegnids, èn il bler uschè u uschia commembers da la biblioteca, u gnanc savevan ch'igl è oz insatge spezial. Tuttina èn las bibliotecaras cuntentas d’esser part dal «Biblioweekend».
Portas avertas a Trun
Auter a Trun: Là hajan bleras visistadras e blers visitaders dà suatientscha a l'invit la sonda, rapporta la Fundaziun Medias Rumantscha FMR. Malgrà che las frequenzas en biblioteca sajan sa sminuidas durant la pandemia, mussia quai che l'interess per la purschida d'ina biblioteca saja anc adina avant maun, uschia la manadra Olivia Pfister
