Siglir tar il cuntegn

Header

In event da Big Air vegn a Cuira
Legenda: In event da Big Air vegn a Cuira Keystone
cuntegn

Big Air Festival a Cuira 17'000 persunas per di vegnan spetgadas sil areal da l'Obere Au

Il Big Air vegn ad avair lieu ils 22 e 23 october sin l'areal da l'Obere Au a Cuira. La planisaziun da l' event ha cumenzà avant tschintg mais. In curt temp per in eveniment per passa 30'000 persunas. Ils organisaturs èn però plain findanza ch'il Big Air daventa in success.

Giavischà eran era gronds artists internaziunals da l'America. Pervia da la pandemia da corona na vulan quels però betg vegnir en Svizra. Tuttina datti durant dus dis concerts cun stars internaziunals. Per exempel Sido u Apache 207. Era artists svizzers stattan sil program. Ils pli enconuschents èn Lo e Leduc. Durant dus dis vegni a dar concerts e silsuenter anc festa cun DJs ch'èn live sil areal da l'Obere Au.

Cumbat per sa qualifitgar per ils gieus olimpics

Sper la musica datti er la part sportiva. Freeskiers e snowboardists cumbattan al Big Air per sa qualifitgar per ils gieus olimpics . Cunquai che quai è ina da las paucas pussaivladads da sa qualifitgar èn la glista d'annunzia gia ussa pli che pleina. Cunquai che la Svizra è la naziun hospitanta han ils atlets svizzers era plazzas da partenza sin segir.

audio
Cuira è pront per il Big Air
04:25 min, Actualitad dals 19.08.2021.
laschar ir. Durada: 04:25 minutas.

Cuira collavura cun ulteriuras destinaziuns

Per il turissem è quest eveniment in fitg grond gudogn. Betg mo per la citad da Cuira. Senza la collavuraziun da las destinaziuns na fissa betg pussaivel da porscher in letg per mintga collavuratura e mintga giast. Perquai è Cuira Turissem en stretg contact e collavuraziun cun autras destinaziuns sco per exempel Lai u Laax.

L'entir eveniment custa als organisaturs tranter tschintg e sis milliuns francs. La speranza è gronda ch'il Big Air Festival Cuira 2021 è pir l'entschatta e ch'ins po en l'avegnir organisar mintg'onn in tal festival da sport e musica.

RTR actualitad 17:00

Artitgels legids il pli savens

Scrollar a sanestra Scrollar a dretga