Il chantun Grischun sto ponderar co sustegnair destinaziuns turisticas che pateschan spezialmain da la pandemia da corona. Surtut destinaziuns da congress (sco per exempel Tavau) ubain destinaziuns cun giasts da fatschentas (sco per exempel Cuira) dovrian sustegn. Quellas nodian per part enfin 70% damain pernottaziuns il mais. Il Cussegl grond ha surdà al minister d’economia Marcus Caduff l'incumbensa da realisar in tal program per stabilisar il turissem. Deputadas e deputads han acceptà l'incumbensa cun 57 cunter 39 vuschs (tar duas abstenziuns).
Cusseglier guvernativ Marcus Caduff è sa dustà adumbatten. El ha fatg attent ch'i na dettia enfin uss insumma anc nagin program d'impuls per il turissem.
Plinavant sto la regenza grischuna elavurar ina strategia turistica, che duai esser in’orientaziun per tut ils acturs dal turissem. Era quest’incumbensa ha il Cussegl grond surdà a Caduff. La regenza vul dentant formular questa strategia a moda averta – senza relaschar directivas che pertutgan las strategias da destinaziuns ed organisaziuns turisticas.