Siglir tar il cuntegn

Header

video
Chantun prenda mesiras perquai ch'ins è al cunfin cun capacitad da testar
Or da Telesguard dals 29.11.2021.
laschar ir
cuntegn

Blera lavur per labors Tests en scolas e manaschis èn al limit

Il chantun Grischun ha actualmain problems d'evaluar a temp ils tests da corona en il manaschis e las scolas. La raschun è ch'il volumen dals tests è creschì massivamain las ultimas emnas. Il chantun prenda perquai mesiras immediatas.

En l'entira Svizra èn surchargiadas las capacitads dals labors. Per consequenza na pon las provas betg vegnir evaluadas a temp util. Perquai prenda il chantun mesiras immediatas per pudair cuntinuar cun il program grischun da testar:

  • I vegnia ad interim be testà ina giada per emna en las scolas. Sch’almain quatter persunas d’ina classa han in test positiv, sto l’entira classa ir per 10 dis en quarantina.
  • En ils manaschis po ina persuna far maximalmain trais tests per emna. Persunas vaccinadas na duain da princip betg sa laschar testar regularmain en il rom dals tests en ils manaschis e far maximalmain in test per emna.
  • Las persunas da contact da persunas infectadas duain far mo pli mintga segund di in test.
  • Ils certificats COVID sin basa dals tests en ils manaschis restan previsiblamain gratuits fin la fin da la stagiun d'enviern. I na po dentant betg vegnir garantì ch'ils certificats da Covid gratuits vegnian consegnads aifer 48 uras.
  • Uffants e persunas creschidas cun sintoms èn supplitgadas da restar a chasa e da sa laschar testar tar in post da test uffizial (center da test, media u medi da chasa, apoteca) e betg en il rom dals tests en las scolas.

Per pudair cuntinuar cun ils tests repetitivs ston las quantitads da tests pudair vegnir adattadas a las capacitads dals labors. Sch'i na reussescha betg da reducir la quantitad da tests cun agid da las mesiras menziunadas vegnan ins a stuair examinar ulteriuras mesiras.

Gia vid augmentar las capacitads

Perquai ch'ils labors èn surdumandads cun il quantum da tests actual (passa 40'000 evaluaziuns per emna), vegnia il mument priorisà tenor sorts da test, uschia il manader dal stab da crisa chantunal, Martin Bühler. Sco emprim vegnian evaluads ils tests da persunas cun sintoms, suenter ils tests da scola e lura quels da manaschi. Uschia sajan las mesiras actualas necessairas per ch'ils labors vegnian suenter. In test fetschia numandamain be senn sch'il resultat vegnia entaifer in tschert temp.

Gia quest'emna va en funcziun en il labor ina nova maschina. Quella sto però anc vegnir qualifitgada ed ils process ston vegnir adattads. Fin che tut quai va, dovri in zic flad. Ma la finamira è da puspè pudair evaluar uschè spert sco pussaivel ils tests entaifer in temp util.
Autur: Martin Bühler manader dal stab da crisa chantunal

Ins saja però gia en stretg contact cun il labor principalmain pertutgà per augmentar las capacitads. Quai saja uschè u uschia stà previs da far per il cumenzament da la stagiun d'enviern. Ussa vegnia quest pass simplamain fatg pli spert. Gia quest'emna duai in'ulteriura maschina per evaluar ils tests ir en funcziun. In zic pazienza dovria quai però anc.

audio
Il chantun è al cunfin cun las capacitads da testar
03:33 min, Actualitad dals 29.11.2021.
laschar ir. Durada: 03:33 minutas.

«I renda da rinforzar il sistem da testar»

En sasez è la strategia dal Cussegl federal clera: Tgi che vul laschar vaccinar po far quai. Tgi che na vul betg, sto betg, ils tests èn però da pajar sez sch'ins n'ha nagins sintoms. Tuttina è Martin Bühler da l'avis ch'i fetschia senn da porscher en il Grischun vinavnat ils tests da scola e da manaschi.

D'ina vart dettia tuttina anc bain inqual persuna che laschia pir dar l'emprima vaccinaziun e blers che sajan s'annunziads per la terza vaccinaziun. E da l'autra vart saja gist en vista a la stagiun d'enviern ed eventualas mutaziuns d'avantatg d'avair sper la vaccinaziun supplemantarmain in sistem da testar etablì. Gist perquai rendia tenor el da far quest sforz per adattar ed eliminiar ils problems. Ils instruments sajan qua e fin la primavaira saja planisà sa lavurar cun quels.

Ord l'archiv

A partir dals 23 da november vala puspè obligatori da mascras en scolas grischunas, quai a partir da la 3. classa. Il virus tutga fermamain persunas pli giuvnas, in terz dals infectads èn sut 20 onns.

video
Scolas en il GR: Hotspots dal coronavirus
Or da RTR Social dals 22.11.2021.
laschar ir

RTR novitads 09:00

Artitgels legids il pli savens

Scrollar a sanestra Scrollar a dretga