L'emna passada hajan ins constattà en Val Bregaglia plirs cas positivs da Covid, uschia il president communal da Bregaglia, Fernando Giovanoli, envers RTR. Silsuenter hajan ins testà tut ils uffants e la magistraglia da la scola a Malögia. Quels tests hajan mussà che 20 scolaras e scolars sco er trais persunas da la magistraglia èn infectadas. Sinaquai sajan la scola a Malögia sco er quella a Stampa e Vicosoprano vegnidas serradas per immediat.
Nus avain stuì serrar la scola – er perquai che nus n'avain nagina glieud per remplazzar la magistraglia ch'è positiva. En sasez stuessan nus tegnair avert la scola per ils uffants ch'èn sauns, ma senza glieud na va quai betg.
Ils uffants da la scola a Malögia fan enfin che la scola avra puspè (ils 7 da settember) homeschooling. Ils uffants che van a scola a Stampa u Vicosoprano han survegnì pensums, almain per glindesdi e mardi. Mesemna vegnia lura decis sch'igl è pussibel da turnar en scola, ma quai dependia er sch'i dettia scolastas u scolasts che n'èn betg infectads, concluda il president communal.
Tests per tuts
Als tests participeschian betg be ils uffants e la magistraglia, mabain er pedellas e chauffeurs, ha declerà il president communal da Bregaglia. Tut tenor resultat suondan lura mesemna tests individuals.
Ord l'archiv
Il chantun Grischun ha testà scolaras e scolars en trais scolas sin corona. Co chattan insumma ils scolars sezs da vegnir testads?
