Siglir tar il cuntegn

Header

cuntegn

Bloccada d'antennas 5G Decisiun en il cas Malans ha effect sin zonas da planisaziun

Pliras vischnancas grischunas bloccheschan cun zonas da planisazun novas antennas. Ina nova sentenzia dal Tribunal federal fa frunt a questa pratica. La sentenzia pertutga la vischnanca da Malans.

Trais interpresas per telefonia mobila han recurrì encunter la zona da planisaziun per antennas per func mobil a Malans. Il Tribunal federal dat uss raschun a la Swisscom, la Sunrise e Salt. La raschun per il recurs: La zona da planisaziun – che sa derasava gist sur l’entir territori da Malans – bloccava la construcziun da novas antennas. Avant il Tribunal federal han la Swisscom, Salt e Sunrise fatg valair che gliez saja exagerà.

audio
Decisiun da Malans ha er consequenza per autras vischnancas
aus Actualitad vom 03.05.2022.
abspielen. Laufzeit 2 minutas 49 Sekunden.

Tenor Losanna n'è la decisiun betg commensurada

Era il Tribunal federal vesa quai uschia. Ina zona da planisaziun che bloccheschia per in tschert temp il dretg da bajegiar, stoppia esser commensurada. Ina vischnanca possia tuttavia ponderar da scumandar antennas en zonas dad abitar, en zonas maschadadas u era scumandar antennas che disfigurschian in maletg dal vitg protegì sco a Malans.

Ma da bloccar novas antennas gist sin l’entir territori – era en la zona d’industria – na saja betg commensurà, scriva il Tribunal federal en sia sentenzia ch’el ha publitgà quest’emna.

Era autras vischnancas fan quai

La decisiun dal Tribunal federal pertutga anc autras vischnancas grischunas che bloccheschan actualmain novas antennas cun zonas da planisaziun en lur vischnanca.

Malans ha en il fratemp decidì nua ch’ins dastga bajegiar antennas e nua betg. Vul dir: La zona da plansaziun n’è betg pli en vigur. Tuttina ha il tribunal decidì en chaussa – perquai che la decisiun è d’interess era per ulteriurs cas. En la sentenzia vegn menziunà che 6 ulteriuras vischnancas sa chattan actualmain en ina sumeglianta situaziun.

Las preinstanzas – la regenza grischuna e la dretgira administrativa grischuna – avevan oriundamain dà raschun a la vischnanca da Malans e refusà il recurs da la Swisscom, da Salt e Sunrise. En il futur vegn la decisiun dal Tribunal federal ad avair influenza sin las decisiuns pertutgant zonas da planisaziun dad autras vischnancas.

Nus stuain uss cussegliar las vischnancas tenor questa decisiun dal Tribunal federal, per che quest sbagl na vegn betg a sa repeter.
Autur: Richard Atzmüller planisader dal Chantun

Swisscom è satisfatga

La Swisscom è levgiada suenter questa sentenzia. I saja impurtant d'avair segirezza da dretg per pudair engrondir la rait, hai num tar l’interpresa.

Tenor noss giuditgar giess quai memia lunsch, ed il Tribunal federal vesa quai era uschia.
Autur: Annina Merk pledadra da la Swisscom

La zona da planisaziun a Malans avess perfin cumpeglià la zona industriala. La Swisscom n’avess gnanc dastgà planisar e bajegiar là.

RTR novitads 17:00;

Artitgels legids il pli savens

Scrollar a sanestra Scrollar a dretga