Las pendicularas da Brambrüesch tiran ina bilantscha positiva per la stagiun passada 2020/2021. Malgrà la pandemia da corona è la svieulta entras transports creschida per radund 6% sin 1,76 milliuns francs. Per il gestiunari da las pendicularas Patrick Arnet, saja quest resultat fitg cuntentaivel damai che la situaziun da corona na saja betg stada simpla.
Ina raschun per il resultat positiv saja stà tranter auter il nov record da scarsoladers durant l'enviern sco era las bunas venditas da l'abunament annual.
Update en connex cun la nova pendiculara
Durant la conferenza da medias ha il cussegl administrativ infurmà davart la nova pendiculara che duai remplazzar las duas veglias davent da la stagiun d’enviern 2026. Actualmain dettia bler lavur davos las culissas, declera il president dal cussegl administrativ Andreas Riedi.
La nova pendiculara vegn a correspunder als novs basegns che nossa clientella ha ozendi.
Quai pertutga per exempel las lubientschas per bajegiar u las concurrenzas per las repartiziuns da lavur. Damai ch’ils 24.4 milliuns francs – ils custs totals per la nova pendiculara – vegnan da la citad da Cuira sajan els liads vid reglas pli severas. Ina tscherta visiun saja dentant gia avant maun. Tar la cabina veglian els sa focusar sin ils basegns da spazi per mountainbikers u famiglias cun charrotschas.