Per daventar pli persistents vul il chantun Grischun ch'i vegnia duvrà dapli material da bajegiar reciclà enstagl material primar. Actualmain na vegnia bler material da rument ch'i dat entras disfatgas u renovaziuns betg reciclà ni be per part reciclà. Il chantun Grischun e la Federaziun grischuna da l'industria da betun e da glera vulan ussa midar quai, scriva il chantun en sia communicaziun.
Broschura duai gidar
Cun ina broschura duai sviluppadras e sviluppaders da projects survegnir sustegn co duvrar materials pli persistens. La broschura mussa, tge products reciclads che pon vegnir duvrads per tge diever en la construcziun auta e bassa. Cun disfar e renovar bajetgs dettia numnadamain bler rument da construcziun. Ma quel possian ins reciclar. Ina part da quest material vegnia elavurà a granulats ed or da quel possian ins puspè producir nov material da construcziun che saja almain uschè bun sco material primar. Tenor communicaziun saja la dumonda persuenter dentant anc memia pitschna. Gist ozendi ch'i vegnia discurrì bler da persistenza fissia perquai bun da duvrar dapli material reciclà che na saja betg engrevgià uschè fitg cun CO2.
