A Brusio è in tschierv da curuna vegnì fraudulà da Nadalnotg. Trais umens vegnan suspectads d'avair sajettà l'animal e d'avair cuntrafatg ad ulteriuras reglas da la lescha da chatscha. Els ston ussa sa responsar avant dretgira.
La saira da Nadalnotg ha la polizia survegnì l'annunzia ch'intginas persunas han chargià in tschierv en in auto. Lasuenter ha ina patruglia da polizia controllà ils suspectads en lur lieu da domicil. Ils trais indigens – in um da 30 onns, ses bab da 61 onns ed in ulteriur giuven da 29 onns – han lura concedì d'avair fraudulà il tschierv da curuna.
Ulteriurs delicts
Durant l'inquisiziun da polizia hai dà ulteriurs indizis ch'ils trais umens han gia avant violà las leschas da chatscha e dad armas. Els han concedì d'avair fraudulà dus ulterius tschiervs tranter il december 2020 ed il mars 2021, sco er in girun da mieurs protegi l'october 2021.
