Il persunal dals hotels pon persequitar direct, tge giasts che nizzegian cura tge spiertas. Vul dir, sch'ina persuna va cun pedalo, nizzegia las pendicularas, va en in museum u a far bogn cun la carta, sa il persunal d'in hotel, tut tenor interess, persequitar questas activitads e po uschia controllar il giast. Quai han pliras emploiadas confermà envers Blick.ch.
Per l'incumbensà per la protecziun da datas dal Grischun, Thomas Casanova è questa situaziun delicata.
I fa surstar che questas datas èn accessiblas a tantas persunas.
El è da l'avis che sulet la glieud che dovria las datas, dastgian er avair access a quellas. La recepziunista u il recepziunist da l'hotel na tutgia betg latiers. Medem vesa quai er ina pledadra da l'incumbensà federal per la protecziun da datas. Plinavant dastgian questas datas mo esser accessiblas per in curt temp ed ils giasts stoppian vegnir infurmads davart questa procedura.
Directur da turissem na vesa nagin problem
Il directur da turissem da la regiun, Roland Schuler, ha confermà envers il Blick ch'ils hoteliers han access a las datas da lur giasts. Dentant mo da lur giasts e betg dals giasts dad auters hotels.
El na vesa dentant nagin problem tar la pratica actuala. Mo las datas da l'emprima utilisaziun da la carta e l'ultima utilisaziun dad in di vegnian arcunadas. En pli sajan hoteliers uschè u uschia obligads da registrar las datas da lur giasts.